Congress-in CJI paihthlak phutna petition hnukkir

Congress Party chuan Chief Justice of India Dipak Misra paihthlak phuta Supreme Court-a petition an thehluh chu nimin khan an hnukkir. Eptuten Parliament-a CJP paihthlak phutna motion an putluh chu Rajya Sabha chairman Venkaiah Naidu chuan a lo hnawlsak tawh bawk a ni.

Congress MP pahnih chuan Naidu-an CJI paihthlak phutna motion a hnawl chungchangah Supreme Court-ah hian petition an thehlut a ni. An petition-ah hian Naidu-a thutlukna siam dan chu dan kalh leh midang rawn loa ama thutlukna anga siam niin an puh a, CJI an puhna chungchang hi engmah chhui chian a ni lo niin an sawi.

Congress MP-te petition thehluh hi Jutice AK Sikri, SA Bobde, NV Ramana, Arun Mishra leh AK Goel-te awmna bench chu ngaihtuah tura tih a ni. Mahse court hian Congress MP-te aiawhtu, Kapil Sibal chu CJI-in bench a siam chungchanga thupek a tihchhuah copy chu a pe duh lo a ni. Judge panga awmna bench chuan petition chungchanga Sibal-a thusawi tur chu an ngaihthlaksak dawn tih an sawi a, mahse Sibal hian order copy pek a nih hma chuan engmah a sawi loh tur thu a sawi. Court hian order copy hi a pek duh tak loh avangin Sibal chuan petition hi a hnukkir tih a sawi ta a ni.