Bengaluru-a in pakhat atangin voter ID 9,000 chuang an man

Assembly inthlan neihna tur, Karnataka-a Bengaluru-a Jalahalli biala in pakhat aṭangin Thawhlehni zan khan Karnataka Election Commission official-te chuan Electors Photo Identity Card (EPIC) 9,746 chuang an man a, he thil thlengah hian Congress leh BJP chuan mawhphurtuah an inpuh tawn nghal.

Voter ID card 9,746 manna hi Raja Rajeshwari Nagar constituency huam chhung a ni a, BJP chuan he thil thlengah hian Cong-ress chu puhin mipui thlawpna an hmuh ṭhat loh avangin dik lo takin an che a ni a tia , he biala inthlan neih tur chu ṭhulh turin a phut nghal. Hetih lai hian Congress party chuan voter card lem tam tham tak manna flat neitu chu BJP hruaitu a ni tih a sawi thung. He flat luahtu Rakesh chu kum 2015-a corporate election-ah pawh BJP ticket-a a din thu an sawi.

State election commission chuan voter ID card an mante hi uluk taka tuama hmuh a nih thu sawiin, heng card-a hmingte chu elector dik takte hmingte an nih thu a sawi. Lehkhaa tuam niin, heng lehkhaah hian hming leh phone number-te pawh a inziak bawk. Voter card an manna flat hi Majjula Nanjamuri ta niin, Rakesh inti hnenah a luahtir a ni. He in aṭang hian ID-te bakah laptop panga, printer pakhat, thingrem lian pahnih leh electoral roll-a hming dah belhna atana hman Form 6 acknowledgement slip-te pawh hmuh tel a ni bawk.

Karnataka Chief Electoral Officer Sanjiv Kumar chuan voter ID card an man hi chhui chian a ni dawn tih a sawi a, FIR pawh thehluh nghal a nih thu a sawi. Raja Rajeshwari Nagar constituency-ah hian elector 435,439 an awm a, summary revision neih hnuhnung berah khan vote nei thar 25,825 dah belh an awm a ni.

Election Commission of India chuan nmin khan voter ID card man chung-chang chhui chiang tur hian Karnataka-ah special observer a tir nghal a, vawiin-ah report kimchang hriat theih beisei a nih thu official chuan a sawi.