Maharashtra loneituten an nawrh huaihawt dawn

Maharashtra state-a loneitute chuan state sorkarin an laka a thu-tiamte a tihhlawhtlin loh avanga lungawi lohna lantirin, May 14 hian inmantir tura nawrh huaihawt 'Jail Bharo' huaihawt an tum.

Loneitu pawl leh political party ṭhenkhat hruaitute chuan 'Jail Bharo' hi taluka leh district level-ah huaihawt a ni dawn tih an sawi a, sorkarin loneitute dinhmun a ngaihsak theihna tura buatsaih tur an nih thu an sawi.

Satyashodhak Shetkari Sabha hruaitu Kishor Dhamale chuan, "Sorkar chuan loneitute hamṭhatna tur hrang hrang a tiam chungin engmah a taka kalpui a awm lo a ni. Kawng hrang hrangin, electric bill pek loh, chawh nghei, kawngzawh leh thil dang hmangtein lungawi lohna kan lantir tawh a, mahse tun thlengin engmah tihsak kan la ni lo", a ti.

Dhamale chuan sorkarin rate ṭha zawk a siamsak theih loh avaga bawngvulhtute an bawnghnute hralhnaah an sum hloh phuhrukna tura cheng vaibelchhe 7,000 pe turin an phut tih a sawi. "Maharashtra-ah hian nitin bawnghnute litre vaibelchhe thum vel tharchhuah a ni a, sorkar chuan liter khat Rs 27-a leisak tiam mah se loneitute hian liter khat Rs 20 chauhin an hralh a ni. Hei vang hian nitin cheng vaibelchhe 21 hloh a ni a, tun thlenga an sum hloh hi cheng vaibelchhe 7,000 a ni tawh a ni", a ti

Loneitu pawl hruaitu dang Raghunath Patil chuan nikuma state sorkarin loneitute loan ba, cheng vaibelchhe 34,000 ngaihdam tur puan chu tun thlengin loneituten an la chhawr lo tih a sawi bawk. Patil chuan, "Loan ba ngaihdam a nih tur thu puan anih hnuah leiba ngah avanga harsatna tawk loneitute 2,000 zet an intihhlum hman tawh a ni. Sorkarin loneitute tana cheng vaibelchhe 3,000 pek a tiam zingah cheng vaibelchhe 20,000 pawh semchhuah a la ni lo" tiin a sawi.