Lakhimpur Kheri pawikhawihna chhui chiang turin Uttar Pradesh sorkarin Commission a din

Uttar Pradesh sorkar chuan nimin khan Lakhimpur Kheri-a mi pariat thihna thlen chhan chhuichiangtu tur member pakhat awmna, one-member Commission a din tih senior Home Department official chuan a sawi.

"Commission din turin thupek chhuah a ni tawh a, Commission hi thla hnih chhunga thil thlen dan kimchang chhui turin hun pek a ni," a ti.

Pathiannia Lakhimpur Kheri-a nawrh huaihawt, loneitute chu Uttar Pradesh deputy chief minister Keshav Prasah Muray hmuak tura kal, BJP worker-te khalh motor hmanga chil an nih avangin buaina a chhuak a, buaina chhuakah hian mi pariat an thi a, an zingah loneitu pali an tel a ni.

Congress-in lungawilohna lantir dawn
Congress party chuan Lakhimpur Kheri-a loneitute thah an nih avanga lungawi lohna lantirin, vawiin hian Punjab-a Mohali aṭangin Uttar Pradesh-a Lakhimpur Kheri thleng kawng an zawh dawn.

Congress hruaitu, Punjab chief minister Charanjit Singh Channi leh Chhattisgarh chief minister Bhupesh Baghel-te chuan Nilaini khan Lakhimpur Kheri-a loneitu thi chhungte hnenah zangnadawmna, cheng nuai 50 an pe dawn tih an lo sawi ve ve tawh bawk.

Uttar Pradesh sorkarin phalna a pek hnuah, Congrss hruaitu Rahul Gandhi leh member panga awmna Congress palaite chuan Nilaini khan buaina chhuahna hmun Lakhimpur Kheri hi an thleng tawh a ni. Gandhi hi senior party leader, Bhupesh Baghel, Charanjit Channi, KC Venugopal leh Randeep Surjewala te'n an ṭawiawm a ni.

Loneitu pawl, Samyukta Kisan Morcha chuan Union Minister of State for Home Affairs Ashish Mishra fapa Ajay Mishra hoa lirthei pathum lo tlan chuan lungawi lohna lantira pungkhawm loneitute chu a chil zui niin an puh. Ashish Mishra hian loneitute hi hnawlin SKM hotu Tajinder Singh Virk chu chil tumin a bitum tih an sawi. Mahse Ashish Mishra chuan an puhna te hi a pha a, pawikhawihna thlenna hmunah hian a tel ve loh thu a sawi thung.