Loneitute thlavang hauhtu BJP MP Varun Gandhi BJP national executive list tihchhuah tharah a tel lo

Lakhimpur Kheri-a pawikhawihna thleng chungchangah BJP hruaitu zingah MP Varun Gandhi chiah a la ṭawngchhuak.

Varun Gandhi chuan loneitute chunga thil thleng chu a dem thu sawiin, tualthahna a ni, a ti. SUV dumin loneitu awmkhawmte an hnung lam aṭanga su lai video pawh Gandhi hian Thawhlehni khan a twitter-ah pawh a dah lang a, rilru a tihnat thu a sawi. He video aṭang hian SUV chuan boruak ṭha tak hnuaia nawrh huaihawtte chu a su lui ngei tih a langchiang tih sawiin, pawisawilote thisen latute chu hrem ngei a phut thu a sawi a ni. "Nawrh hauihawtte hi tualthahna hmanga ngawi bo tir theih an ni lo. Loneitute thisen chhuahtute chuan hrem ngei a, rorel­na dik tak kalpui a ni tur a ni," a ti. UP chief minis­ter Yogi Adityanath hnenah pawh lehkha thawn­in, he thil thleng hi Central Bureau of Investiga­tion (CBI) chhui tir tur leh, thi chhungte chu zángnadawmna Rs vaibel­chhe khat pe tura a phut thu pawh a hrilh bawk.

Loneitute thlavang hauha a ṭawng chhuah hnuah, nimin khan BJP in national executive member list thar a tihchhuahah Varun Gandhi leh a nu, Maneka Gandhi hming chu an lang tel lo nghal a ni. He thil hian sawizui a hlawh nghal hle a, BJP lam chuan Gandhi-te nufa telh loh chhan thil dang vang niin, member inthlak kual chu an kalpui dan ṭhin niin a insawithiam nghal thung.

BJP hian national executive member atan hian mi 80 ruatin, special invitee 50 leh permament invitee 179 an nei bawk a ni.