Mi tam tak aiin ka nu hi a Indian zawk - Rahul Gandhi

Congress president Rahul Gandhi chuan a nu Sonia Gandhi chu India mi tam tak aia a Indian zawk thu, nimina Bengaluru-a press conference a neihah a sawi.

Rahul Gandhi chuan, "Ka nu hi Italian a ni a, mahse a hun tam leh pawimawh zawk chu India-ah a hmang a ni. India mi tam tak aiin a Indian zawk a, he ram tan hian a inhlan a, he ram tan pawh hian thil tam tak a tuar a ni", a ti.

Prime Minister Narendra Modi chuan a thusawi naah Sonia Gandhi hi a hminghmerha sawi lang loin a bei a, ramdang hmeichhia, India rama kum 50 vel awm tawh, Hindi ṭawng hmang leh hrethiam tak tak lo chu Indian-ah ngaih theih an ni dawn em ni tih lam hawiin a lo sawi tawh a ni. Hei hi Rahul Gandhi chuan a chhang let a ni.

Rahul chuan Modi chu a thusawi duh dan aṭang chuan eng ang prime minister nge a nih a, a quality dik tak chu a lang nghal a ni tih sawiin, a sawi chak leh nuam tih zawng a nih chuan sawi zel rawh se, a ti.

Congress hruaitu chuan prime minister ni tura a inpeih thu a sawi chungchanga Modi-a'n a beih letna pawh chhangin, Modi chu midang rilru hruaipen tumah a puh bawk.

Rahul Gandhi chuan inthlan neih tur hi Rahul-a chungchang a ni lo tih sawii, "Tunah chuan Prime Minister chungchang buaipui dan hi ka hrethiam tawh a ni. A thil chhan let theih lohah chuan mipui rilru hruaipen tum zawngin thu a sawi ṭhin a ni", a ti.

PM Modi hian Rahul Gandhi-an PM ni tura a inpeih tawh thu a sawi hi election rally a neihnaah bei letin, India ram chuan hetiang mi puitling lo leh lar ve ringawt hi ram hruaitu atan a pawm thei dawn em tih a ngaihtuah thu a sawi a, amah chuan hlauhthawnna lian tak a neih thu a sawi.

Rahul chuan Modi hian a chhungrilah thinurna a pai a, hei hi ama lakah chauh ni loin mi zawng zawng lakah a ni tiin, hei vang hian hlauhthawnna a nei a ni, a ti.