SC-in Lakhimpur buaina thleng chungchangah UP sorkar a khak

Lakhimpur Khera-a buaina thleng chungchangah Supreme Court chuan Yogi Adityanath kaihhruai BJP sorkar chu khakin, ṭawng ringawt, a taka hma la si lohah a puh.

Cheif justice of India NV Ramana chuan nimina hearing an neihnaah, UP sorkar hmalak danah an lungawi lo hle tih sawiin, sorkar leh police-te chu an mawhphurhna anga hma la tura an beisei thu a sawi. Police-te chu buaina thlennaa kal vat a, pawikhawihtute man tur an ni lawm ni? tiin a zawt let hial a ni.

UP sorkar aiawhtu, lawyer Harish Salve chuan an tih tur ang an ti lo tih chu a pawm­pui thu a sawi ve bawk.

Mi pariat thihna thlenna, Pathiannia Lakhimpur Kheri-a buaina chhuaka inhnam­hnawih zinga puh, union minister Ajay Mishra fapa chu tun thlengin man a la ni lo a, thu zawhfiah tura a kohnaah pawh a kal lo. Hemi chungchangah pawh CJI chuan UP sorkar chu khakin, "Case dang pawikhawihtua puhte laka chet dan angin he case-ah pawh hian in che tur a ni," tiin minister fapa man a la nih loh chhan pawh a zawt nghal a ni.

Kabil Sibal-a'n PM Modi ngawih chhan a zawt
Congress senior leader, Kapil Sibal chuan nimin khan Lakhimpur Kheri buaina chhuak chungchanga prime minister Narendra Modi-a'n ngawih a chuh tlat chhan a zawt. PM Modi hian tawhpuirna ṭawngkam khat lek pawh chhakchhuak se a tawk hle a ni, a ti.

Sibal chuan, "Lakhimpur Kheri-a boruak ṭha lo tak thlengah hian engatinge i ngawih reng? I lak aṭang hian tawrhpuina ṭawngkam khat chauh kan phut a, chu chu thil harsa tak a ni lo ang," tiin a twitter-ah PM Modi hi a chhal a ni. PM Modi chu eptu lamah a awm lai ni se, he thil thleng chungchangah hian eng ang takin nge a chhan let ang tiin a zat nghal bawk.

Tunkar tir lam khan Sibal hian Lakhimpur Kheri-a pawikhawihna thlengah hian inrawlh turin Supreme Court pawh a lo ngen tawh a ni. Supreme Court-in a ngaihtuah zui tak avangin Chief Justice of India chungah pawh lawmthu a sawi a ni.