India ramah Covid-19 kai thar 21,257 awm belh

India ramah Ningani khan Covid-19 kai thar 21,257 an awm belh leh a, Nilainia hri kai hmuhchhuah (22,431) aṭangin 5% in a tlahniam a ni. Ramchhungah coronavirus vanga thi 271 an awm belh leh bawk.

Covid-19 hri kai mek, active case hi hri kai hmuhchhuah tawh aṭanga 0.71% ni mekin, March 2020 hnua a hniam ber ṭum a ni a, hri kai mek mi 2,40,221 awmin, ni 205 hnua an tlem ber ni a ni.

Hri kai dama puan, recovery rate chu 97.96% a ni mek a, March 2020 hnua a san ber ṭum a ni. Ningani khan hri kai dama puan 24,963 awm lehin, rampuma dama chhuahtir zat chu 3,32,25,221 an ni tawh.

Nitina hri kai thar, daily positivity rate chu 1.53% ni mekin, ni 39 chhung 3% hnuailamah a awm tawh a, kartina hri kai zat, weekly positivity rate chu 1.64% a ni.

India ramah nimin thleng khan Covid-19 vaccine dose vaibelchhe 93.17 chuang semchhuah a ni tawh. Sorkar chuan India rama puitling zinga 71% chuan vaccine dose khatna an la tawh tih sawiin, heng zinga 27% chuan dose bikimin an la tawh bawk a ni.

Kerala chuan Covid-19 kai thar 12,288 an nei leh a, state chhunga hri kai mek zat chu 1,18,744 an tling tawh a ni. Sorkar laipui chuan kar hmasa chhunga India rama Covid-19 kai hmuhchhuah zinga 56% chu Kerala state aṭanga hmuhchhuah an nih thu a sawi. Hmarchhak state Mizoram-a Covid-19 kai an pun chak avangin sorkar laipui chuan an dinhmun enfiah tur leh, hri darh tur ven kawnga hma lak dan turte enpui turin member pali awmna team a tir.

State panga - Mizoram, Kerala, Sikkim, Manipur leh Meghalaya-ah chuan kar khata hri kai hmuh chhuah, weekly positivity rate chu 5% chunglam vek a la ni.

West Bengal chuan Covid-19 vanga thi 13 an neih belh leh a, state chhungah hri vanga thi 18,876 awm tawhin, Ningania Covid-19 kai thar 771 awm thar nen coronavirus kai tawh zat chu 15,74,017 an tling tawh.

Delhi-ah chuan Ningani khan Covid-19 kai thar 44 an awm a, thihpui erawh an awm lo thung a ni. Test aṭanga hri kai zat hmuhchhuah zat chu 0.07% a ni.

India mi Covishield vaccine dose bikima la tawh emaw UK-in a vaccine a pawmpui dang emaw la tawhte chu October 11 aṭangin Britain an thlenin an inkhunghran a ngai tawh dawn lo.

Sorkar laipui chuan hunpui lo thleng turah mipuite chu fimkhur tura chahin, Covid dona kawngah tha thlah lo turin a ngen a, hri ni loin hlimna thehdarh turin a chah.