Lakhimpur violence : Union minister fapa man a ni

Uttar Pradesh-a Lakhimpur Kheri-a October 3-a tharum thawhna thlenga mi pariat thihna thleng chungchanga mawhphurtu zinga puh, union minister Ajay Mishra Teni fapa, Ashish Mihsra chu Inrinni khan man a ni ta.

Ashish Mishra hi Lakhempur Kheri-a loneitu nawrh huaihawta pungkhawmte motora chiltu zingah a tel nia sawi a ni a, buaina thlen hnuah pawh hun eng emaw chen man loha a awm hnuin Inrinni zing dar 10.50 khan man a ni. Lakhimpur jail-ah dah nghal niin, nimin khan thu zawhfiah a ni.

Lakhimpur buaina thleng chungchanga chhuichiangtu team-a official chuan Ashish Mihsra hian buaina a thlen lai, October 3-a chawhnu dar 2:30 - 3:30 inkara a awmna hmun tak a sawichiang thei lo niin a sawi. Minister fapa hian loneitu chiltu motor zinga pakhat, SUV chu a motor ni mah se he thil thlen lai hian motor-ah hian a chuang ve lo niin a sawi. A motor khalhtu, mi eng zat nge chuang leh zawhna dang an zawhte chu engmah a chhang mumal thei lo a, a tel ve lo tih chiah a sawi zel niin police officer chuan a sawi. Thu an zawhfiahna kawngah minister fapa hian a thawhpui ṭha lo hle niin an tarlang.

Buaina thleng kaihhnawihah hian police-te chuan kar liam ta Ningani khan mi pahnih an man tawh bawk. Anni pahnih hi jounanlist leh loneitute chiltu motor pakhatah an chuang dun niin police-te chuan an sawi.

Uttar Pradesh chief minister Yogi Adityanath chuan Lakhimpur Kheri-a thil thleng chungchangah inpuhna ringawt hmangin a kaihhruai sorkar chuan mi a man ngawt dawn lo tih a sawi. Buaina chhuaka thi chhungte hmu tura eptu pawl hruaitute an kal chu sawiselin,thil ṭha tih tuma kal an ni lo, a ti.