Thla 7 hnua nikhata Covid kai tlem ber ni a thleng

India ramah Inrinni khan Covid-19 kai thar 18,166 an awm a, hei hi thla sarih hnua ni khata hri kai an hmuhchhuah tlem ber ni a ni. Hemi ni hian ramchhungah coronavirus kaihhnawih vanga thi mi 214 an awm belh leh bawk.

Covid-19 hri kai mek, active case chu hri kai tawh zat, total infection aṭanga 0.68% an ni a, March 2020 hnua a hniam ber ṭum a ni.

Hri kai mek chu 2,30,971 niin, ni 208 hnua an tlem ber ṭum a ni.

Covid-19 kai dama puan, recovery rate chu 97.99% niin, March 2020 hnua a san ber ṭum a ni. Inrinnia dama chhuahtir 23,624 awm belh leh nen India rama hri kai dampui tawh zawng zawng chu 3,32,71,915 an tling tawh.

Nitina hri kai thar, daily positivity rate chu 1.42% ni mekin, ni 41 chhung 3% hnuailamah a awm tawh. Kartina hri kai zat, weekly positivity rate chu 1.57% a ni mek bawk.

India ramah Covid-19 vaccine dose vaibelchhe 94.70 semchhuah a ni tawh. Union health minister Mansukh Mandaviya chuan ramchhunga state 19-te chu chak zawka dose semchhuak tur leh India ramin vaccine dose vbc 100 chuang a semchhuah thuai theihnan ṭan la tura fuihin, hunpui thleng turah Covid kaihhruainate chu zawm ṭhat a nih loh chuan Covid-19 hi nasa zawkin a darh leh thei niin a sawi.

Prime minister Narendra Modi chuan India rama Covid-19 vaccine semchhuah dan chu fakin hlawhtling taka vaccine an semchhuah theihna tura puitu, mipuite hnenah lawmthu a hrilh.

Delhi-ah Inrinni khan Covid-19 kai thar mi 30 awmin, positivity rate chu 0.05% a ni. Hemi ni hian hripui vanga thi an awm lo.

West Bengal sorkar chuan hunpui ṭan hma hauhin mi tam tak chuan Durga Puja pandal an tlawh tawh tih sawiin, hripui leng a la tawp loh avangin mipuite chu puipunna hmunte chu pumpelh hram turin a ngen. Hetih lai hian Covid-19 vangin Inrinni khan an state-ah mi 12 dang an thih belh leh a, state chhunga thihpui zat chu 18,894 ni tawhin, hri kai thar mi 776 an awm belh leh a, hri kai tawh zawng zawng zat chu 15,75,577 an tling tawh a ni.

Ni li hnuah Kerala chuan hri kai mi 10,000 hnuailam a nei a, hri kai thar 9,470 leh thihpui 101 awmin, hri kai hmuhchhuah tawh zat chu 47,84,109 leh thihpui tawh zat chu 26,173 an ni.

Maharashtra-ah coronavirus kai thar 2,486 awm belh lehin, hri kai hmuhchhuah tawh hi 65,75,578 an ni a, Covid-19 kaihhnawiha thi mi 44 awm belh leh nen thihpui tawh zat chu 1,39,514 an tling tawh tih health department chuan a sawi.

Tamil Nadu-ah hri kai thar 1,344 an awm a, Covid-19 kai hmuhchhuah tam zualnate chu Chennai, Coimbatore leh an ṭhnenawm Chengalpet district te niin, hri kai hmuhchhuah tawh zat chu 26,76,936 a ni.