Covid-19 Hri kai mek aiin enkawl dam an tam tawh zawk
India ramah Covid-19 hri lengin ziaawm lam a pan hlei thei lo a, ni sarih chhung a zawna hri kai hmuh chhuah tam ber ni a thlen hnuah nimin piah lam aiin nimin report-ah hri kai hmuh chhuah thar pahnihin an tlem a, mi 9,985 an awm.
Hri kai hi pung reng mah se enkawl dam pawh an tam tawh hle thung a, nimina Ministry of Health and Family Welfare report tihchhuahah mi 1,35,206 chu enkawl dam tawh niin hri kai mek aiin a ṭum khatna atan an tlem zawk. Rampumah hri kai mek mi 1,33,632 an awm a ni.
MoHFW report tihchhuah hma darkar 24 chhungin hri kai enkawl dam mi 5,991 an awm a, thihpui 279 awm lehin mi 7,745-in an thihpui tawh. Enkawl dam tawh rate hi 48.88% a ni a, thihpui rate chu 2.80% a ni thung.
Indian Council of Medical Research (ICMR) chuan darkar 24 chhugin sample 1,45,216 an test thei tawh tih sawiin nimin piah aiin sample 3,534 an test tam zawk. Nimin thleng khan sample test 50,61,332 a awm tling tawh a ni.
ICMR hian nasa takin hma an la reng a, hri leng enfiah theihna laboratory pawh 800 chuang pawmpui tawhin nimin thleng khan laboratory 825-ah Covid-19 sample test hi a tih theih tawh. Sorkar laboratory 590 lai a pawmpui tawh a, private laboratory 233 an pawmpui tawh bawk.
Covid-19 enkawlna tur damdawi-in 985 a awm
Nimin khan New Delhi-ah video conferencing kaltlangin Group of Ministers (GoM) meeting vawi 16-na neih a ni a, hetah hian GoM chairman leh union health minister ni bawk Dr Harsh Vardhan chuan June 9 thleng khan ram pumah hripui leng mek enkawlna tur bik damdawi-in 958 a awm tawh thu a sawi. Heng Covid damdawi-inahte hian isolation bed nuai 1.67 leh ICU khum 21,000 a awm tawh tih a sawi a ni.
Union minister chuan oxygen hman pah theihna khum 73,000 a awm tih sawiin Covid-19 pual damdawi-in piah lamah hian COVID Health Centre 2,313 leh COVID Care Centre 7,525 a awm tawh thu a sawi bawk.
Coronavirus vei enkawlna tur, khum ventilator hman theihna 21,494 a awm tih a sawi bawk a ni.