DMK MLA Covid-19 vangin a thi

Tamil Nadu-a eptu party, DMK MLA  J Anbazhagan chu nimin zing lam khan Covid-19 vangin a thi a, India rama politician zinga he hri vanga thi hmasa ber a ni.

June 2 khan thawk lama harsatna a neih avangin kum 62 mi J Anbazhagan hi Chennai, Chromepet-a Dr Rela Institute & Medical Centre-ah dah luh a ni a, Covid-19 a kai tih hmuhchhuah a ni nghal bawk. A tukah ventilator hmanga enkawl zui a ni.

Thawhṭanni khan a dinhmun hian zual lam panin, pneumonia a vei bakah a kal lam a ṭhat loh thu damdawi-in lam hian an tarlang a ni.

Nimin zing khan hospital chuan DMK MLA hi theihtawpa enkawl a ni chungin an chhan zo ta lo tih a sawi. Anbazhagan hi a piancham vawi 62 na, June 10-ah a thi ta a ni.Tamil Nadu-a politician lar zingah he hri vanga thi hmasa ber a ni.  

Tamil Nadu chief minister E Palanisamy leh DMK chief MK Stalin-te chuan Anbazhagan an ui thu an sawi a, Stalin chuan an party office tinah ni thum chhung sun a ni dawn tih a sawi.