India leh China sipai inbiakna a hlawhchham

Ladakh-a India leh China sipaite inhmuhthiam loh chungchangah ram pahnih military commander-ten Pathiannia inbiakna an neih leh chu a hlawhchham.

Indian Army chuan thuchhuah siamin, "Meeting-a India lamin a ṭha zawnga hmalakna tura rawtna a siamte chu China lam chuan a pawmpui thei lo a, rawtna bawhzui tlak pawh engmah a siam thei lo a ni," a ti. Meeting hi resolution pawh siam loin an titawp a ni.

China lam pawhin inbiakna chu a hlawhchham nia sawiin Chinese military-a Western Theater Command chuan ,"India lam hian thil atthlak leh awm ang lo tak an phut a, hei hian inbiak a tih harsat phah a ni," a ti. China lam chuan ramria boruak muanawm a awm theihnan theihtawp an chhuah tih a sawi bawk.

Pathiannia inbiakna an neih hi Ladakh khawchhak lama ram pahnih sipaite inepna leh, friction point aṭanga sipaite lakchhuah dan tur chungchanga an inbiak ṭum 13-na a ni a, darkar riat leh a chanve zet meeting hi an nei a ni. Hemi hmaa inbiakna an neih hnuhnun ber chu thla hnih chuang liamtaah khan niin, an inbiakna avang hian Gogra (Patrol Point - 17A) aṭangin sipaite pawh lakchhuah zui a ni. Gogra-a resolution an siam hmang hian flashpoint paruk zinga pali aṭangin ram pahnih sipaite pawh hnuhdawh an ni a, hetih lai hian Depsang leh Hot Springs-ah erawh a la inep zui zel thung.

India chuan Depsang leh inepna hmun danga inremna a awm theihna turin resolution siam a rawt a, hei hi ram pahnihte inkar boruak siamṭhat zelna tur atan pawh thil ṭul leh pawimawh niin a sawi a ni.

Khawvela mihring tamna ram pahnihte hian ramri, Line of actual Control-ah hian sipai 50,000 - 60,000 vel an dah ve ve a ni.

Tun ṭuma inbiakna an neih leh hma lawk khan China sipaite chu India ramah ṭum hnih, Uttarakhand-a Barahoti sector leh Arunachal Pradesh-a Tawang sector-ahte an rawn lut leh nia sawi a ni. Uttarakhand-ah hian China sipai, People's Liberation Army (PLA) 100 dawn chu August 30 khan LAC pelin Barahoti sector chhungah an lut a, darkar rei vak lo an awm hnuah an kir leh a ni. Arunachal Pradesh-a Tawang sector-ah pawh ni 10 vel liam ta khan Yangste bula ram pahnih sipaite hi an inep leh a, mahse commander-ten inbiakna an neih hnuah an buaina hi chinfel a ni leh nghal tih an sawi.

Kar liamta Inrinni khan Chief of Army Staff General MM Naravane chuan China-in Ladakh chhaklam biala sipai tam tak a dah chhunzawm zel a nih chuan, India pawhin PLA-te tih dan ang bawkin Indian Army tam zawk a dah ve zel mai dawn a ni, a ti.