BJP MP Varun Gandhi fak turin Shiv Sena-in loneitute ngen

Shiv Sena chuan Uttar Pra­desh-a Lakhimpur Kheri-a buaina chhuak chungchangah BJP MP Varun Gandhi-a'n lonei­tute thlavang a hauhsak chung changah, loneitu pawl hrang hrangte chu Varun Gandhi laka fakna resolution siam turin a ngen.

Shive Sena chanchinbu, Saamana-a editorial-ah hemi chung chang hi ziakin, Shiv Sena chuan tun thla tir lama Lakhimpur Kheri-a thil thleng rapthlak tak, mi pariatin an thih phahna chungchang chuan MP dangte rilru a tawk ve em tih zawtna te a siam. Buaina chhuaka thi zingah hian lunngawi lohna lantirtu loneitu pali an tel a, he thil thleng hi loneitu pawl hrang hrang leh eptu party-te chuan demin, central leh UP-a BJP sorkar an bei zui nasa hle.

"Indira Gandhi tupa leh Sanjay Gandhi fapa, Varun Gandhi hian Lakhimpur-a thil thleng rapthlak tak a hmuh hian ngawi mai thei loin a ngaihdan dik tak a rawn puang chhuak a ni," tiin he thilin politics lama a dinhmun a nghawng zel dan tur pawh ngaituah lo leh, loneitute thah an nih chungchang a demna thu a sawichhuak chuan a huaisen zia a lantir a ni, a ti.

Lakhimpur Kheri-a loneitute hian BJP sorkarin farm law a siam thar duh lohna an lantir a, heng mite thlawpna leh an chunga thil thleng demna thu Varun Gandhi-a'n a sawi hi BJP hruaitu lam a tilawm lo viau nia sawi a ni. Buai­na thlen chungchang demna thu a sawichhuah hnu lawka BJP-in national executive member list a tihchhuahah pawh Pilibhit MP Gandhi hi a tel ve lo a ni.

Congress hruaituten 'Maun Vrat' hmang
Congress party hruaitute chuan Lakhimphur Kheri-a tharum thlawhna thleng duh lohna lantirin, nimin khan ram pumah Maun Vrat (Vow of Silence) an hmang.

He pawikhawihna thlengah hian a fapa a inhnamhnawih nia sawi a nih avangin union minister of state for home affairs Ajay Mishra chu bang turin an phut bawk. Ajay Mishra fapa hi man ni tawhin, thu zawhfiah tura hren mek a ni.

Congress hruaitute hian state hrang hranga central government office kawtah 'Maun Vrat' hi an hmang a ni.