India, America, Japan, Australia-te'n Malabar drill nei ṭan

India, US, Japan, leh Australia ramte chuan kumin chhunga a ṭum hnihna atan nimin aṭang khan Bay of Bengal-ah Malabar naval drill an nei ṭan.

Exercise thawh khatna hi August 26-29 khan Pacific Ocean-a Guam thliarkarah neih a ni. He hunah hian destroyers, frigates, corvettes, submarines, helicopters, long-range maritime patrol aircraft leh elite special forces - US Navy SEALs leh Indian Navy marine commando-te an tel a ni.

A thawh hnihnaah hian Indian Navy chuan INS Ranvijay, INS Satpura, P-8I long-range maritime patrol aircraft leh submarine-te an thawhchhuah pui a ni. US Navy hian aircraft carrier USS Carl Vinson, USS Lake Champlain leh USS Stockdale te an thawhchhuahpui bawk. Japan-in JS Kaga leh JS Murasame thawhchhuah puiin, Royal Australian Navy chuan HMAS Ballarat leh HMAS Sirius-te chu drill atan hian an thawhchhuah pui a ni.

Malabar exercise hi kum 1992 aṭang khan India leh US-in naval exercise anga kumtin neih turin an nei ṭan a, an huam chin pawh zauh zelin a vawi khatna atan kum 2005 khan India leh US Navy aircraft carrier-te an tel tawh a ni. Kum 2014 khan Japanese Maritime Self Defence Force chu member nghet ni tura lakluh leh niin, nikum aṭang khan Australia hian a rawn zawm ve leh bawk.

Kum 2020, November thla khan Arabian Sea leh Bay of Bengal-ah Malabar execise hming hian naval drill pui tham tak an lo nei tawh bawk a ni.