Ajay Mishra an ban duh loh vangin BJP-in rorelna dik kenkawhna tur an dal - Rahul Gandhi

Congress party hruaitu Rahul Gandhi chuan Uttar Pradesh-a Lakhimpur Kheri-a buaina chhuak chungchanga prime minister Narendra Modi kaihhruai sorkar laipui chu a bei chhunzawm zel.

Mi pariat thih phahna, Lakhimpur Kheri-a buaina chhuaka mawhphurtu zinga puh, union minister of state for home Ajay Kumar Mishra fapa, Ashish Mishra chu October 3 khan man a ni tawh a, hetih lai hian BJP hian Union Minister hi an la bantir duh loh vangin rorelna dik kenkawhna tur kawng an dal a ni, a ti.

Rahul Gandhi chuan a twitter kaltlangin sorkar laipui hi a bei chhunzawm a, BJP kaihhruai sorkar laipui chuan Lakhimpur-a tharum thawhna thlenga thi loneitute leh BJP worker-te chu a ngaihtuah tak tak lo tih a sawi. Loneitute tana rorelna dik a phut thu pawh a tarlang nghal bawk.

Lakhimpur-a buaina chhuakah hian loneitu pali bakah BJP worker pahnih, driver leh journalist an thi a ni.

Thawhṭanni khan Priyanka Gandhi leh Congress hruaitu dangte chuan Union minister ban phutin ramchhung hmun hrang hrangah silent protest an lo buatsaih tawh a, nimin khan Lakhimpur Kheri-a Tikonia khua state chhung hmun hrang hrang aṭanga loneitu kalkhawmten buaina chhuak thi loneitu pali leh journalist-te puala tawngṭaina hun an buatsaih chu Priyanka hian a telpui ve leh bawk.

Hetih lai hian Uttar Pradesh Police chu kar liamta Inrinni zana darkar 12 chuang thu zawhfiah tura an kawl hnuah Ashish hi Thawhṭanni khan ni thum dang tan kawl phalsak leh a ni. Investigation team-a senior official pakhat chuan Mishra hian October 3-a pawikhawihna thlen lai dar 2.30 p.m - 3.30 p.m inkar khan a awmna hmun a sawitheih loh thu a sawi.