Nepal-ah Prime Minister Modi a zin

Prime Minister Narendra Modi chu ni hnih cham turin nimin khan Nepal-ah a zin.

PM Modi hian nimin zing khan Kathmandu a thleng a, airport-ah Nepal Defence Minister Ishwar Pokhrel leh Province 2 Chief Minister Lalbabu Raut-ten an lo hmuak a ni.

Modi hian prime minister a nih hnuah Nepal a tlawh ṭum thumna a ni a, kumina Nepal sorkar thar a din hnuah a tlawh vawi khatna a ni. Nimin khan Janakpur-a Janaki Temple tlawhin temple-ah hian Nepal Prime Minister KP Sharma Oli chuan Modi hi a lo nghak a ni. Hruaitu pahnihte hian temple-ah hian puja an nei nghal a, temple board member pakhat chuan Modi hi ngaihhruihna thilpek a lo pe bawk.

Temple an tlawh hnuah PM Modi leh Nepal PM Pil te hian Janakpur leh Uttar Pradesh-a Ayodhya inkalpawhhna tur bus service an hawng dun bawk. Modi chuan Nepal ramin a lo lawm dan chu lawmawm a tih thu sawiin, India mipuite tana thil lawmawm tak a nih thu a sawi. Janakpur leh Ayodhya inkalpawhna tur siam chu ram pahnih tana thil chhinchhiah tlak a nih thu a sawi a, hei hi ram pahnih mipuite inzawmna nghet leh ṭha siamna tur lungphum pawimawh tak a ni, a ti.

PM pual hian Janakpur Sub-Metropolitan City-a Barhabigha Ground-ah inkhawm buatsaih a ni bawk.

Nepal-a a cham chhung hian Modi leh Oli-te hian ram pahnihte thawhdunna tur thuthlung eng emaw zat an ziah beisei a ni. Hei bakah hian cheng vaibelchhe 6,000 senga siam Arun3 project, power MW 900 pechhuak thei tur pawh an hawng nghal ang.

Modi hian Nepal President Nepal Bidhya Devi Bhandari leh Vice President Nanda Bahadur Pun pawh a kawm dawn a, Nepal-a political party hrang hrang hruaitute a hmu bawk ang.