BJP-in J&K CM sawisel

Jammu and Kashmir-a PDP nena ṭangrual sorkar siamtu, BJP chuan an thawhpui PDP hruaitu leh Chief Minister Mehbooba Mufti-i chu sawiselin, inkahhai puan a rawtna chu ram tana thil ṭha a ni loh thu leh, state sorkar chu security force-te lunga tawng ṭhinte laka nem lutukah a puh.

BJP state unit-a thupuangtu, Sunil Sethi leh Arun Gupta-te chuan Jammu-a press conference an buatsaihah chief minister-in inkahhai puan a rawt chu sawiselin, hei hi helho intuaithar lehna tura hun remchang siamsakna mai turin niin an sawi. Ningani-a all party meeting neihah pawh inkahhai chungchang hi sawiho a ni a,mahse inremna an siam thei lo a ni.

BJP thupuangtute chuan Kashmir Valley dinhmun chu ngaihtuah a ngai takzet niin an sawi a, hetiang dinhmun an tawn chhan chu Mufti-i kaihhruai sorkar policy nem lutuk vang niin an sawi. "Kashmir-ah chuan lung-a intawng a la thleng reng a, vanduaithlak takin khualzin pakhatin nunna a chan phah leh a ni. Security dinhmun hi ngaihtuah ṭhat a ngai hle a ni", tiin an sawi. State sorkarin security force-te bei let a, lunga lo tawng ṭhinte a ngaihdam leh mai ṭhin avangin hei hian boruak a tichhe zawk zel niin an sawi.

CM Mufti-i hian Ramzan thla intan hun, May thla laihawl aṭanga Amarnath Yatra zawh hun, August thla thlengin an state-a inkahhai puan chungchang chu sorkar laipuiin a ngaihtuah a ngai a ni tiin a sawi. Mahse BJP chuan hei hi an pawmpui theih loh thu sawiin, helhote chu nawr behin an awm mek a, nitin hel kahhlum pawh an awm niin an sawi. Hei vang hian inkahhai lo puan chu helho chhanhim tumna anga a ngaih thu sawiin, sipaite kut phuarsak an duh lo tih an sawi a ni. Hei bakah hian CM rawtna anga Prime Minister Narendra Modi hmu tura all party aiawh tirh an duh lo tih an sawi a, party dangte pawhin an pawmpui lo niin an sawi bawk.