Bombay HC-in Arnab Goswami bail dilna hnawl

Republic TV Editor-in-Chief, Arnab Goswami chu Thawhṭanni khan Bombay High Court (HC) chuan bail a dilna chu a hnawlsak.

Goswami hian court-ah hian interim bail a dil a, mahse court chuan he a bail dilna hi prima facie-a hnawlsak a nih thu a tarlang a, bail diltu a ukil hian regular-a bail theihna dang tur a dapna kawngah bail a dilna hnawlsak hian a huam lo ang, tiin court chuan thuchhuah a siam.

Kar liam ta khan Goswami bakah interior desginer Anvay Naik leh a nu intihhlum chung changa inhnamhnawihna nei puh dang,  Shaikh leh Sarda-te chuan dan dik loa man an ni tiin HC-ah hian petition an thehlut a, interim bail an dil nghal bawk a ni. 

An ukil-te hian HC-ah hian bail an dil bakah hian FIR an laka siam chu ennawn turin court chu an ngen bawk a ni. He thil hi HC chuan December 10-ah a ngaihtuah ang. 

Goswami, Shaikh leh Sarda-te hi November 4 khan Maharastra police-ten an man a, an man chhan hi kum 2018-a kum 53 mi, Anvay Naik leh a nu intihhlum chungchang vang a ni. Republic TV-in an pawisa ba an pek duh loh vangin an intihhlum phah niin police official-te chuan an sawi a, Anvay-a'n a thih hmaa lehkha a hnutchhiahah pawh Arnab Goswami-a'n a pawisa tam tham tak a batsak chu a pek duh loh thu leh, hei vang hian sum lama harsatna nasa tak a tawh phah thu a sawi.