Karnataka : Sorkar siam tur la tifel lo ; JDS MLA-te Rs vbch 100-a lei tumah BJP puh

Karnataka assembly inthlan neih zawh takah party mala sorkarna siam thei tur an awm lo a, nimin thleng khan sorkarna siam tur tur a la chiang thei lo. Hetih lai hian BJP chuan Janata Dal Secular (JDS) MLA-te chu cheng vaibelchhe 100-a tham tumin a dawr niin JDS hotu chuan a sawi.

BJP chu party mala seat la hnem ber niin MLA 104 an nei a, mahse sorkar siam turin MLA 112 neih tlin a ngaih avangin sorkar an siam pha lo. MLA 78 Congress leh MLA 37 nei JD(S) chuan ṭangrual sorkar siam an tum a, independent MLA pathumin an thlawp bawk. Mahse Governor Vajubhai Vala chuan sorkar siam turin tumah a la sawm lo.

Hetih lai hian BJP pawhin ṭangrual sorkar siampui tumin JDS MLA 32-te a bia a, mahse JDS MLA-te hian an an rawtna hi an pawmpui lo niin JDS hotu leh Congress-JDS thawkdunin chief minister atana a ruat HD Kumaraswamy chuan a sawi. Nimin khan BJP chief minister candidate BS Yeddyurappa chuan Governor hi a hmu a, sorkar siam turin MLA mamawh zat hi an nei thei dawn niin a hrilh.

JDS hotu chuan BJP hian an party MLA-te hi cheng vaibelchhe 100 pek leh, sorkarah cabinet position pek tiamin a thlem niin a sawi a, pawisa pawh pek nghal mai turin Delhi lamah an nei fel thlap tawh nia an sawi thu a sawi. Mahse union minister Prakash Javadekar chuan Kumaraswamy puhna hi thu dik lo niin a sawi thung.

Congress party thupuangtu Randeep Surjewala chaun JDS-Congress ṭangrual chuan sorkarna siam thei tur MLA an ngah tawk avangin Governor Vajubhai Vala chuan sorkar siam tura a sawm thuai an beisei thu a sawi a, governor tan hian thlan tur dang a awm lo a ni, a ti. BJP-in part mala seat ngah ber an nih vanga sorkar siam tura sawm a ni tur a ni tia an sawi chu, inthlan lo neih tawhna Goa, Manipur leh Meghalaya-ah pawh zawm a ni lo tih a sawi. Heng state pathumah hian Congress chu party mala seat la hnem ber ni mah se, Governor-te chuan BJP leh a thawhpui party-te chu sorkar siam turin an sawm zawk a ni. Hei vang hian BJP hian seat la hnem ber party-te sorkar siam tura sawm tur a tih chu state pathumah anmahni ngeiin an lo bawhchhe tawh a ni, a ti. Congress party chuan Governor hi thlei bik nei loa thilti tura an phut thu sawiin, Congress-JDS-ten MLA 117 an neih laia MLA 104 neitu BJP chu sorkar siam tura a ko hmasa a nih chuan Supreme Court-ah thlen a tum tih an sawi.

Hetihlai hian Karnataka-a JDS-Congress ṭangrual sorkar siama chief minister atana JDS hotu Kumaraswamy dah tumna chu Congress MLA pathumin an thlawp lo nia sawi a ni bawk. Heng MLA pathum–Rajshekhar Patil, Narendra leh Anand Singh te chu biak pawh theih loha an awm vangin nimin zinga Congress MLA thlan tharten meeting an neih tum pawh tikhawtlai a ngaih phah nia sawi a ni. Congress MLA ṭhenkhat chuan BJP lamin an biak thu leh, ministry pek an tiam thute an sawi a, mahse an sawmna chu an pawm lo tih an sawi.

Congress leh JDS chuan BJP-in an party MLA ṭhenkhatte sum hmanga thlema a biak avangin, sorkar siamfel anih hma chuan an party MLA-te hi hmun khatah awm khawm tir tumin ruahmanna an siam bawk.