Varanasi-a flyover chimah mi 18 thi

Uttar Pradesh-ah Varanasi-a flyover sak lai chu Thawhlehni khan a chim a, mi 18 an thi.

Flyover hi Varanasi rel station bula mi niin, Thawhlehni chawhnu lam khan a chim a ni. A chim chhan hi a pillar sak dan dik tawk loh vang nia sawi a ni. Hliam tuar eng emaw zat an awm a, hengte hi Kabir Chaura Hospital-ah dah nghal an ni.

Chief Minister Yogi Adityanath-a chuan vanduaina tawkte a tawrhpui thu a sawi a, flyover chim dan chhui chiang tur hian member pathum awmna committee a din nghal a ni. Committee hi darkar 48 chhunga report thehlut tura hriattir an ni. Flyover chim vanga thi chhungte hi cheng nuai nga ṭheuh pek an nih tur thu CM chuan a sawi a, hliam tuar na zualte chu cheng nuai hnih ṭheuh pek an ni bawk ang.

Deputy CM KP Maurya chuan flyover chim vang hian chief project manager HC Tiwari, project manager KR Sudan, assistant engineer Rajesh Singh leh engineer Lal Chand te chu suspend nghal an nih thu nimin khan a sawi.