Andhra Pradesh-ah lawng chesual

Andhra Pradesh-a East Godavari district-ah Thawhlehni khan lawng chesualin a let a, lawnga chuang mi 40 vel chu nimin thleng khan an chin hriat lohin an la awm.

Godavari luia lawng chesualah hian mi 50 vel an chuang nia hriat a ni a, an zinga 10 chu an chetsual hnu hian vaukam lamah an hleuh kai a ni. Lawng chetsual thu hriat a nih veleh National Disaster Response Force, State Disaster Response Forece leh Eastern Naval Command-te chu chhanchhuah hna thawk tura tirh nghal an ni a, nimin thleng khan chin hriat loa awmte hi zawn chhunzawm an ni.

Lawng hi Kondamodalu aṭanga Rajamahendravaram pana a kal laiin thli tleh leh ruahsur nasa vangin a chesual ta nia sawi a ni. Lawnga chuang zinga 10 chu anmahniin vaukamah an hleuh kai a, midangte erawh chu an chin hriat a ni rih lo a, luiah hian an tlahlum vek nia rin a ni.

Kar kalta Zirtawpni khan Godavari luiah vek hian mimal lawng, mi 90 chuanna chu lui laia a awm laiin a kang a, mahse vanneih thlak takin lawnga chuangte hi chhanchhuah hman vek an ni.