Lakhimpur Kheri : Congress hruaituten President Kovind an hmu

Uttar Pradesh-a Lakhimpur Kheri-a buaina chhuak leh mi pariatin an thih phah chungchang chuan buaipui a la hlawh chhunzawm zel a, he thil thleng sawipuiin nimin khan Congress party hruaitute chuan President Ram Nath Kovind an hmu.

Congress hruaitute hian Lakhimpur-a mi pariat thihna thlengah hian union minister of state for home affairs Ajay Mishra Teni fapa, Ashish Mishra chu puh a nih avangin Union Minister hi bang tura an phut thu an sawi. Hei bakah hian Supreme Court emaw, High Court emawa judge ṭanglai pahnih kaihhruaiin he buaina chhuah dan chhui chiangtu tur commission din an phut bawk.

President hnenah hian party hruaitu Rahul Gandhi, Rajya Sabha-a leader of opposition Mallikarjun Kharge, AK Antony, Ghulam Nabi Azad leh Priyanka Gandhi Vadra-te chuan Lakhimpur Kheri-a loneitute chunga rawng taka chetna chu ngaihdam theih loh a ni tih sawiin, he thil thleng hian India mite rilru a tihlauthawng a ni, an ti.

Pawikhawihnaa inhnamhnawih, union minister fapa Ashish Mishra man a nih tawh hnuah a pa hi minister a nihna aṭang ban a la ni lo chu an dem thu sawiin, Union Minister-ah a la awm reng chuan police official-te pawhin huai takin a fapa chungchang hi an chhui ngam loh a hlauhawm thu an sawi bawk.

Party hruaitute hian memorandum thehlutin, "Chhun khaw en laia rawng taka inthahna thleng leh, a hnua state sorkar leh sorkar laipui chet zui zel dan hian rorelna dik kengkawh tura mipuiten beiseina an lo neihte chu a thaibo sak a ni,"tiin an sawi.

Delhi khawpui daia farm law pathum duh lohna lantira loneitute nawrh an la huaihawt chhunzawm zel chungchang pawh sawilangin, Congress hruaitute chuan Narendra Modi kaihhruai sorkar chuan heng mite hi inbiakna awmze nei tak a neihpui duh lo a ni tiin, an policy chu hlawhchham tur tih hriatsa a ni, an ti.