Kerala sorkarin Covid-19 vanga thi awmna BPL chhungkua Thla tin Rs 5,000 pe dawn

Kerala chief minister Pinarayi Vijayan chuan an state-a BPL chhungkuaa eizawngtu ber Covid-19 vanga thi an awm chuan a chhungte'n state sorkar hnen aṭangin chhawmdawlna, thla tin Rs 5,000 a pe ṭhin dawn tih a sawi.

Chief Minister hian Nilaini khan thuchhuah siamin, cabinet meeting-ah he thutlukna hi siam a nih thu a sawi. He chhawmdawlna hian a hmaa chhawmdawlna dang lo dawng tawh pawh a huam thei vek dawn a ni. Mahse BPL chhungkuaa eizawngtu ber, an sum laluttu ber thite chauh hnenah pek a ni thung ang.

Vijayan chuan chhawmdawlna an siam belh dawngtute hian social welfare hnuaia relief package dang pawh an dawng thei ve dawn tho tih a sawi. An state-a inbengbel, mahse state pawn lama hri vanga thi chhungte pawhin he chhawmdawlna hi an dawng thei vek dawn tih a sawi bawk.

Covid-19 vanga thi, BPL chhungkuate chu sorkarin chhawmdawlna a pek tur dilna thehlut turin tih a ni a, an dilnate hi District Collector leh Revenue thuneitute chuan endikin a ṭul angin hma an la ang.

CM chuan dilna thehlutte hi office-ah ko kher lo turin thuneitute pawh a hriattir a, dilna an thehluh aṭanga ni 30 chhungin an sum dawn turte hi pek tur a nih thu a sawi. Chhawmdawlna thla tina Rs 5,000 pek tur hi kum thum chhung direct benefit transfer hmangin pek an ni ang. Hemi puala budget siam hma chu Chief Minister Disaster Relief Fund aṭangin pek an ni phawt dawn a ni.

India ramah Nilaini khan Covid-19 kai thar 18,987 an awm belh leh a, hri kai tawh zat hi mi 3,40,20,730 niin, Covid kai dama puan, recovery rate chu 98.07% ah a sang chho tawh.

Union Health Ministry data nimin zing dar 8-a tihchhuahah, Nilaini khan hripui thihpui 246 awm belh lehin he hri vanga thi hi mi 4,51,435 an tling tawh a ni. Ni 20 chhung a zawnin coronavirus kai thar 30,000 hnuai lamah tlathla tawhin, ni 109 chhung nitina hri kai thar 50,000 aiin an tlem tawh bawk a ni.