Sorkarin BSF thuneihna huam chin zauh sak

Ministry of home affairs (MHA) chuan state pathum - West Bengal, Punjab leh Assam-a international border vengtu, Border Security Force (BSF)-te thuneihna huam chin a zauh sak. An thuneihna huam chinah hian BSF officer-te hian mi man, dap leh thil chhuhsak turin thuneihna an nei a ni.

Sorkar laipui chuan thuchhuah a siamah, kum 2014 July thlaa hriattirna a tihchhuaha BSF thuneihna huam chin siam tawh chu siamṭhat a nih thu a sawi. MHA chuan Assam, West Bengal leh Punjab-a India-Pakistan leh India-Bangladesh border-a international border (IB) aṭanga km 50 thlengin BSF thuneihna hi a zauh sak a ni. A hma chuan BSF thuneihna hi IB aṭanga km 15 chinah bithliah sak an ni. He thupek tihchhuah tharah hian an thuneihna chin zauh sak an nih bakah, Nagaland, Mizoram, Tripura, Manipur leh Ladakh-ah mi dap leh man phalna pek an ni bawk a, boundary erawh siam a ni ve lo.

Hetih lai hian Gujarat-a BSF thuneihna chin chu border aṭanga km 80 chin aṭangin km 50 chinah tihzim sak a ni thung a, Rajasthan-ah erawh tihdanglam a ni lo.

BSF-te hi Code of Criminal Procedure (CrPC), Passport Act and Passport (Entryto India) Act, Border Security Force Act 1968-a Section 139 hnuaiah thuneihna hi pek an ni.

Sorkar thutlukna siam hi sawiseltu tam tak an awm nghal. Punjab chief minister Charatnjit Singh Channi pawhin na takin a sawisel a, BSF hnena thuneihna pek belhchhah chu federalism beihna a ni, a ti. Thutlukna awmze nei lo tak an siam chu sut leh turin union home minister Amit Shah a phut thu a sawi bawk.

Hetih lai hian MHA chuan he thutlukna hi state 10 leh UT pahniha ramri hrula dan kalha thiltih ṭhin venna leh, ram himna tur ngaihtuah vanga tih niin a sawi thung.