India-ah Covid-19 kai thar mi 19 awm belh

India ramah nimin khan Covid-19 kai thar mi 19 an awm belh a, heng mite hi Maharashtra, Gujarat, Punjab, West Bengal, Uttar Pradesh leh Andhra Pradesh amite an ni. 

India ram pumah Covid -19 kai hi mi 249 an awm tawh a, chung zinga mi 32-te chu ramdang mi an ni a, mi 20 enkawl dam an ni tawh bawk tih ministry of health and family welfare chuan a tarlang. Maharashtra state-ah he hri kai hi an tam ber a, mi 44 an kai tawh a, chung zinga mi pathum chu ramdang mi an ni. 

India ram state zinga Covid-19 kai tamna ber dawttu Kerala-ah Covid-19 beih nan thla hnih chhung atan cheng vaibelchhe 20,000 ruahman a nih thu chief minister Pinarayi Vijayan chuan a sawi. 

State sorkarin sum a ruahman aṭang hian Kudumbasree scheme-ah Rs vbc 2000 dah tum a ni a, employment guarantee programme-ah Rs vbc 2000 dah tum a ni bawk. Health package bik atan hian Rs vbc 500 dah a ni bawk a, pension nei ve lote tan Rs. vbc 1,320 dah a ni a, he pawisa kaltlang hian chhungkaw tinin thla hnih chhungin Rs. 1000 ṭheuh an dawng thei ang. 

Sorkar hnathawkten arrear an lak tur pawh April thla chhunga pek vek hman tura ruahmanna kalpui a ni a, hemi atan hian Rs vbc 14,000 dah a ni. Chaw (food grain) a thlawna semna tur atan Rs vbc 100 dah tel a ni. Subsidized meal atan Rs. vbc 50 dah a ni.

Maharashtra chief minister Uddhav Thackeray chuan hri leng vangin Mumbai, Pune, Pimpri Chinchwad leh Nagpur metropolitan region-a private office, dawr leh sumdawnna hmunte chu Zirtawpni zan zanlai aṭangin March 31 thleng khar an ni dawn tih a puang. 

Sumdawnna hmunte  khar a nih chhung hian ei tur, bawnghnute, thlai leh nitin khawsakna atana mamawh zawrhna te erawh hawn an ni thung dawn a, bank service pawh hawn vek a ni  bawk ang.  Thackeray chuan sorkar office-ah pawh staff  a tlem thei ang ber kalin, 25% zelin an inkal chhawk dawn tih a sawi. Private firm-te chu office khar a nih chhung pawha an hnathawkte hlawh pe chhunzawm vek turin a ti bawk a ni.