Karnataka : SC-in vawiinah sorkar fiah turin hriattir

Karnataka Governor Vajubhai Vala chuan Chief Minister, BJP hruaitu BS Yeddyarappa chu a kaihhruai sorkarin thlawptu a ngah tawk tih fiah tura ni 15 chhung hun a pek hnuin, nimin khan Supreme Court chuan vawiin tlai dar 4-ah Karnataka Legislative Assembly-ah BJP sorkar hi fiah turin thupek a tichhuak.

Karnataka Assembly inthlan neih zawh takah party mala sorkarna siam pha an awm lo a, Congress-JDS thawk dun chuan sorkar siam turin member an ngah tawk tih sawi mah se, Governor Vala chuan party mala seat la hnem ber, BJP chu sorkar siam turin a sawm zawk a, ni 15 chhunga sorkar fiah turin hun a pe bawk a ni.

Governor thiltih danah hian lungawi loin Congress leh JDS party chu Supreme Court-ah an zualko nghal a, Court hian CM atana Yeddyurappa lakluh tur chu dansak lo mah se Congress thu thlen hi nimin khan a ngaihtuah leh a, vawiina sorkar fiah tur hian a ti ta a ni.

Judge pathum awmna special bench chuan Pro tem Speaker ruat nghal turin a ti bawk a, a ni hian floor test neih dan tur hi a buaipui ang. Nimin khan Pro tem Speaker tan hian Speaker hlui leh BJP hruaitu KG Bopaiah chu ruat nghal a ni. Court chuan Karnataka sorkarin secret ballot hman a dilna chu a hnawlsak bawk a, floor test neih hma chuan Karnataka Assembly-a Anglo Indian Representative tur chu a remti lo a, floor test neih a nih hma chuan sorkar chu thutlukna lian tham engmah siam lo turin a ti bawk.

Nimina Supreme Court-in Congress-JDS thu thlen a ngaihtuahnaah hian CM aiawhtu, senior advocate Mukul Rohatgi chuan sorkar fiah tur hian karleh Thawhṭanni thleng hun pe turin a dil a, mahse a dilna hi bench chuan a hnawlsak a ni.

BJP hian sorkarna siam tura MLA neih ngai zat 112 chu pariatin a daih lo a, mahse BS Yeddyarappa chuan Supreme Court thupek chu an zawm tur thu leh, Assembly-ah sorkar fiah hunah thlawptu an nei ngah tawk dawn tih an chian thu a sawi.

Hetihlai hian Congress leh JDS chuan an party MLA 116-te chu sorkar fiah a nih hma chu biak pawh theih loh turin nimin zing khan Hyderabad-ah an hruai. MLA-te hi Banjara Hills-ah five-star hotel-ah dah an ni a, police-ten an veng nia sawi ni.

Congress leh JDS hian BJP hian an party MLA-te chu thlemin cheng vaibelchhe 100-a tham an tum niin an lo sawi tawh a ni. Congress MLA pali erawh chu Ningani zan aṭang khan an bibo a, an awmna chin hriat theih a ni rih lo nia sawi a ni. Heng MLA pali-te hian Congress-JDS thawk dunin chief minister atana JDS hruaitu HD Kumaraswamy dah an tum chu an duh lo nia sawi a ni.

Karnataka Govenor-in majority nei sa, Congress-JDS ṭangualte sorkar siam tura sawm lo a, party mala seat la hnem ber BJP sorkar siam tura a sawm hian sawisel a hlawhin, state dangah pawh nghawng a nei mek.

Tun hnaia assembly inthlan neihna, Goa, Bihar, Meghalaya leh Manipur-ahte chuan eptu party-te chuan assembly inthlan neih hnuhnung berah party mala seat la hnem ber ni mah se, governor-te chuan BJP leh a thawhpuite chu sorkar siam turin an sawm tih an sawi a, hei vang hian Karnataka-a an tih dan zulzui hian sorkar siam tura sawm turin an phut ṭha leh dawn tih an sawi.

Nimin khan Goa-a Congress Legislative Party, Chandrakant Kavlekar kaihhruai chuan governor Mridula Sina hmuin, an party chu House-ah majority a neih leh neih loh fiah tura sawm tura ngenna an thehlut a, governor hian an ngenna ni sarih chhunga lo ngaihtuahsak a tiam.

Bihar-ah pawh RJD hruaitu Tejashwi Yadav-a chuan party mala seat ngah ber an nih avangin sorkar siam tura sawm ṭha leh tura phut turin Governor Satyapal Malik hmuh a tum tih a sawi. Govenor hnenah hian Bihar-a BJP-RJD sorkar chu ṭhiat tura an ngen tur thu leh, RJD chu sorkar siam tura sawm turin an phut dawn tih a sawi a ni.