Malaysia PM hlui in aṭangin pawisa leh tlereuh man
Malaysia Police-te chuan Ningani khan Prime Minister hlui Nijab Razak-a in leh office an dap a, luxury bag, pawisa fai leh tlereuh eng emaw zat an man.
Commercial crime chief Amar Singh chuan PM hlui in aṭang hian ram hrang hrang pawisa bakah, luxury bag, sana manto leh tlereuh tam tham tak man a nih thu a sawi. An thil mante hi bawmah khungin police motor-in an phur chhuak nghal a ni.
Police-ten an man zingah hian designer handbag 284, pawisa fai awmna suitcase 72, tlereuh leh thil hlu dang tam tak awmna a tel. Singh chuan PM hlui Razak-a in hi 1MDB state fund eirua puhna thubuai chhuina kal zela dap an nih thu a sawi. State fund tihchingpen chungchang hi US bakah ram dang pawhin an chhui mek niin a sawi.
US investigator-te chuan Razak leh a thurualpuite hian 1MBD state fund dollar maktaduai 4.5 vel chu an tichingpen niin an sawi a, sorkar sum tam tham tak hi Razak-a private bank account-ah dah luh a nih bakah, dollar matkaduai 23 vel chu a nupui lunghlu ṭhin leina atan hman a nih thu an sawi. Mahse Razak hian an puhna hi thu dik lo niin a sawi thung a, he thubuai pawh hi a PM lai hian tihtawp a ni bawk. Razak-a nupui, Rosmah Mansor-i hi an pa PM laiin bag man to, Birkin bag a lei nasat avangin sawi a hlawh tawh hle a, heng bag-te hi dollar 12,000 aṭanga dollar 2,00,000 mante an ni.
May 9-a inthlanpui neihah kum 60 zet Malaysia-a ro rel tawh, Najib-a party hian hnehna an chang zo lo a, Mahathir Mohamad-a kaihhruai ṭangrual pawl chu chakin, Mahathir hi Prime Minister thar atan lakluh a ni. PM atanga lakluh a nih hnuah, Mahathir chuan IMBD fund tihchingpen thubuai hi chhui thar leh a nih tur thu a sawi nghal a ni.
PM Mahathir chuan Razak-a kaihhruai sorkar thil tih dik loh hi an rin phak aia nasa a ni tih a sawi a, finfiahna ṭha tak lakkhawm anih hnuah thil ti dik lo titute chu man an nih tur thu a sawi bawk. Razak leh a nupui hi ram pawna an zinchhuah khapsak an ni tawh a ni.
Mahathir chuan IMBD aṭanga dollar tluklehding-awn tel pawhpen chu hmuh let tumin sorkarin theihtawp a chhuah dawn tih a sawi a, hemi chungchang buaipui tur hian member panga awmna committee din a ni tawh bawk. Committee-ah hian attorney general hlui leh Financial Services Authority adviser-te pawh an tel.