Global Hunger Index-ah India tlahniam
India chu Global Hunger Index (GHI) 2021-ah ram 116 aṭangin 101-na a ni a, ram ṭhenawm Pakistan, Bangladesh leh Nepal-te aiin a hniam zawk. Kum 2020 khan 94-na a ni.
Report buatsaihtu Irish aid agency Concern Worldwide leh German organisation Welt Hunger Hilfe-te chuan India rama chaw ei tur nei lote dinhmun chu a hlauhthawnawm takzet tih an sawi.
Kum 2020 khan India chu ram 107 zinga 94-na a ni. Kuminah hian ram 116-ah zirchianna neih niin, India chu 101-na ah a tlahniam leh a ni. India GHI score hi kum 2000-a 38.8 aṭangin kum 2012 leh 2021 khan 28.8 - 27.5 inkarah a tlahniam a ni.
GHI score hi tehfung pali hmanga teh ṭhin an ni - chaw ṭha khamkhawp hmu lo (undernourishment), naupang kum nga hnuailam an san zawng leh rih zawng inmil lo (child wasting) , an rualpui zinga hniam bik (child stunting) leh naupang kum nga hnuailam thi zat (child mortality) te an hmang.
India rama naupang zinga ei tur ṭha hmu zo lo, an san zawng leh rih zawng inmil lo te hi kum 1998-2002 inkar khan17.1% niin, kum 2016-2020 chhung khan 17.3% ah a sang chho tih report chuan a tarlang.
"Covid-19 leh hri leng kaihhnawih vanga India rama khuahkhirhna siamte hian nghawng thui tak an nei a, khawvel huapa child wasting nei sang ber a ni," tiin report chuan a sawi.
India ram ṭhenawm Nepal (76), Bangladesh (76), Myanmar (71) leh Pakistan (92) te pawh dinhmun ṭha lo takah awm mek mah se India ram nena khaikhin chuan ramchhung mite eitur an pe ṭha zawk tih report chuan a tarlang.
Hetih lai hian India chu nikum aiin kum nga hnuailama thi zat, naupang ṭhangmuang leh chaw ṭha dawn loh vanga harsatna tawk awm zatah a tlahniam thung.
GHI-in thlirlawkna a neihah khawvel huap, a bikin ram 47-te chuan kum 2030-ah chuan ei tur tlakchhamna hi an la do hneh thei dawn lo a ni. Khawvel boruak lum chak lutuk te, economic leh Covid-19 vanga mipuiten hriselna kawnga harsatna an hmachhawnte hi chhan tam tak zing ami a nih thu a sawi. "Region, ram, district leh khuaa intluk lohna darh zel tur kan ven loh chuan khawvel hi Sustainable Development Goal (SDG) kan thlenpui thei dawn lo a ni" tiin report chuan a tarlang.