India ramah Covid-19 kai thar 16,862 awm ; Hri kai thar zat 11% in a tlahniam

India ramah Ningani khan Covid-19 kai thar 16,862 an awm belh leh a, Nilainia hri kai 18,987 aiin 11% in an tlahniam leh a ni. Sorkar chuan rampumah chak takin vaccine semchhuah hna a kalpui chhunzawm zel bawk.

Hri kai dama puan, recovery rate chu 98.07% ni mekin, nikum March thla hnua a san ber ṭum a ni. Hri kai dama puan thar mi 19,391 awmin, dama puan tawh zawng zawng hi 3,33,82,100 an tling tawh.

Hri kai tawh zat aṭanga hri kai mek, active case chu 1% hnuailamah awmin, 0.60% a ni mek a, hei pawh hi March 2020 hnua a hniam ber ṭum a ni. Hri kai mek hi 2,03,678 awmin, ni 216 hnua a hniam ber ni a ni.

Kartina hri kai zat, weekly positivity rate chu 1.42% niin, ni 112 chhung 3% hnuailamah a awm tawh.

Nitina hri kai zat, daily positivity rate chu 1.43 niin, ni 46 chhung 3% hnuailamah a awm tawh bawk.

Ningani khan ram pumah Covid-19 vanga thi mi 379 an awm leh bawk. Hripui thihpui hi India ramah mi 4,51,814 an awm tling tawh a ni.

Hri leng vanga khuahkhirhna siamte pawh thlahdul chhoh zel a ni. Hunpui thleng mek nen mipuite chu tha thlah loa inkaihhruaina te zawm hram hram turin mithiamte chuan an ngen ngawrh hle.

Hri leng thawh hnihna thleng chu ramchhunga mi nuai chuangin an thihpui tawh a, hei vang hian hri leng thawh thumna chuan hlauhthawnna lian tak a thlen mek a ni.

India ramah vaccine vaibelchhe 97.14 semchhuah a ni tawh a, Nilaini khan dose nuai 27 leh Ningani khan dose nuai 30 chuang semchhuah niin ni rei lote hnuah dose vaibelchhe 100 semchhuah thuai rin a ni. Ram puma vaccine semchhuah ṭan a nih aṭanga ni 85 chhungin dose vaibelchhe 10 semchhuah a ni a, a hnu ni 45 chhungin dose vaibelchhe 10 semchhuah leh niin, ni 29 hnuah dose vaibelchhe 30 semchhuah hman a ni bawk. Hemi aṭang hian ni 24 chhungin dose vaibelchhe 40 a tling chho leh a, ni 20 hnu August 6 khan dose vaibelchhe 50 semchhuah hman a ni.

Union health ministry chuan state leh UT-te hnenah vaccine hi dose vaibelchhe 100 chuang pek chhuah ani tawh tih sawiin, heng zinga dose vaibelchhe 10.53 chu hman lohin an la awm a ni, a ti.