Kerala-ah ruah sur nasa avangin mi 15 thi

Kerala-ah ruahsur nasa avanga chhiatna thlengah mi 15 an thi tawh a, chhiat tawkte chhanchhuah hna pawh thawh mek a ni bawk.

Idukki leh Kottayam district-a ruah vanga leitawlh nasa tak thlengah mi 15 aia tlem loin nunna an chan. Lord Ayyappa zuitute chu nimin leh vawiin lam hian Sabarimala Temple tlawh rih lo turin an ngen a ni.

Nimin zing thleng khan state chhung hmun tam zawkah ruah a la sur chhunzawm a, mahse tuilian erawh a thlen belh tawh lo.

Union home minister Amit Shah chuan, ruahsur leh tuilian tuar mek Kerala dinhmun chu an thlithlai reng tih sawiin, sorkar laipui chuan harsatna tawk mipuite chu a theih ang angin a pui zel dawn tih a sawi. Chhanchhuah hna thawhna kawnga pui turin NDRF team pawh tirh an ni tawh tih a sawi bawk.

Chief Minister Pinarayi Vijayan chuan kar liamta Inrinni khan ṭanpuina hnathawh chak zawka an kalpui theih dan ngaihtuah high-level meeting a ko a, sorkar chuan a theihna zawng zawngin tuilian tuarte chhanchhuah hna a thawk dawn tih a sawi.

Chief Minister hian Covid inkaihhruaina zawm chungin camp din turin a ngen, camp chhungah hian mask, sanitiser, tui thianghlim in tur leh damdawi te dah vek tura tiin, natna benvawn neite leh vaccine la la lo te chu fimkhur turin a chah a ni. State chhunga harsatna an tawh avang hian October 18 aṭanga college hawn tura tih pawh October 20-ah sawn leh nghal a ni.

State sorkar ngenna angin, tualchhung thuneite pui turin Army, Navy leh Air Force te chu tirhluh an ni. National Disaster Response Force chuan team 11 an tir lut tawh bawk.