Sri Lanka-in India hnenah USD mtd 500 loan a dil
Sri Lanka sorkar chuan India hnenah crude oil leina atan US dollar maktaduai 500 loan pek turin a dil.
Sri Lanka energy minister Udaya Gammanpila chuan ramchhungah fuel lama indaih lohna lian tak an tawh theih thu leh an fuel neihsa chuan nakkum January thla thleng bak a daih loh tur thu a sawi.
Sorkar enkawl Ceylon Petroleum Corporation (CPC) chuan sorkar bank lian pahnih- Bank of Ceylon leh People's Bank-ah USD tluklehdingawn 3.3 dawn a ba tawh a ni. An ram chhunga oil distributor-te hian Middle East aṭangin crude oil an lalut a, refined product chu hmun dang aṭangin a lalut thung.
CPC chairman Sumith Wijesinghe chuan, " India-Sri Lanka economic partnership arrangement hnuaia USD mtd 500 puk dan tur ngaihtuahin India High Commisison chu inbiakna kan neihpui mek a ni," a ti.
India leh Sri Lanka energy secretary-te chuan inremna hi loan pekna tur inremna hi an ziah thuai beisei a nih thu finance secrtary SR Attyaglle chuan a sawi.
Khawvel huapa tuialhthei man sang chak tak vangin Lanka hian oil lakluhna man atan kum dang zawng aiin kumin hian an inseng hnem zawk a ni. Nikum nena khaikhinin kumin thla sarih chhunga oil mana an sen hi 41.5% in a sang a, USD tluklehdingawn hnih a tling a ni.
Lanka hian Covid hripui leng vangin tourism leh thil danga a sum lakluh a tlahniam nasa hle a. An ram GDP chu kum 2020 khan 3.6% in a tlahniam a, foreign exchange reserve chu a zahve chuanga tlahniamin, July thla khan USD tluklehdingawn 2.8 a ni. Hengte avang hian kum khat vel chhungin Sri Lankan pawisa pawh dollar laka a hlutna 9% in a tlahniam a, heng vang hian ram pawn aṭanga thil lakluh pawh a to phah a ni.