Loneituten darkar 6 awh nawrh huaihawt

Loneitu pawl hrang hrang telna, Samyukta Kisan Morch (SMK) chuan nimin khan Uttar Pradesh-a Lakhimpur Kheri-a tharum thawhna thlenga loneitu thite tana rorelna dik phutin, ram pum huapin darkar ruk awh nawrh an huaihawt.

Loneitute hian Lakhimphur Kheri-a buaina thlenga mawh-phurhtu zingah a fapa a tel avangin union minister Ajay Mishra chu bang turin an phut a, nimin zing dar 10 aṭanga tlai dar 4 thleng khan hmun hrang hrangah rel kawng an dang a ni.

SMK hruaitu Rakesh Tikait chuan, rorelna dik phuta nawrh huaihawt leh rel kawng dan an tum thu hi ram chhung mipuite pawhin an hre vek a, mahse sorkar laipui chuan hemi chungchangah hian engmah a sawipui loh thu a sawi. Nawrh huaihawt vang hian hmun tam takah rel service pawh a bahlah phah hle a ni.

Hetih lai hian Uttar Pradesh sorkar chuan nawrh huaihawtnaa telte laka action na taka lak a nih tur thu a sawi a, rel service tibuai zawnga chete chu National Security Act hnuaiah thubuai siamsak an ni dawn tih a sawi lawk.

Lakhimpur Kheri-a loneitu pungkhawm, motor-a chil an nih avanga mi pariat thihna thleng chungchanga pawikhawihtu zinga tel, union minister Ajay Mishra fapa Ashish Mishra chu man a ni tawh a, mahse a pa hi union minister-a a awm chhunzawm zel chuan a fapa laka rorelna dik tak lekkawh a har dawn niin loneitute chuan an sawi. Hei vang hian Ajay Mishra hi minister a nihna aṭanga ban turin an phut a ni.

Hetih lai hian Ajay Mishra chuan pawikhawihna thlenna hmunah hian a fapa a awm lo tih a sawi thung a, Ashish pawhin an puhna hi a pha bawk.