Thlawhtheihna-te full capacity-in thlawh phalsak ta

Union ministry of aviation-in thupek a siam thar hnuah, nimin aṭang khan ram chhunga thlawhtheihna service-te chu full capacity-a an thlawh phalsak ṭan an ni.

Ministry chuan ram chhunga hri lengin ziaawm lam a pan tak avang leh, thlawhtheihna hmanga zin duh an pun chhoh zel avangin thupek hi siamṭhat a nih thu a sawi.

Covid-19 hri leng vangin ram chhunga airlines service-naah hun rei tak khuahkhirhna siam a lo ni tawh. Hri leng thawh hnihna a thlen leh hnuah June thla aṭang khan thlawhtheihnate chu 50% capacity chin chauh an phurh phalsak an ni a, July thlaah 65%-ah tipungin, August 12-ah 72.5% leh September 18-ah 85% chinah tihpun sak leh an ni.

100% capacity-a thlawhtheihna thlawh phalna thupek hi October 12 khan tihchhuah niin, he thupek thar hi October 18 aṭanga hman ṭan a nih tur thu aviation ministry chuan a lo sawi tawh a ni. He thupek hi khualzinte ngenna leh, domestic operation dinhmunte uluk taka an ennawn hnuah an siam tih an sawi.

Ramchhunga carrier hrang hrangte chuan sorkarin passenger capacity a tihtam vanga an lawmthu an sawi a, "Hunpui thlen dawnah hian demand sang tak kan neih ṭhin vangin thuthlukna pawm nuam tak a ni a, hripui len hma ang maia thlawh leh chu a ropui dawn khawp mai. Domestic travel demand sang tak leh ṭhanna nasa tak vangin kan phur tawh a ni," tiin IndiGo Airline chuan an sawi.

Private carrier dang Vistara pawhin an thuthlukna chuan anmahni a ṭanpui tur thu sawiin, "Hripui leng nghawng na tak vanga kan hloh takte hmuh let theihna kawng remchang tak a ni a, air travel rin ngamna awm chho zel leh, hunpui lo thleng tura demand a san chhoh hun a nih avangin min pui dawn hle a ni, " a ti.