Covid-19 variant thar awm lo ; Hri leng thawh thumna hlauthawnna tlahniam

Hri leng thawh khatna leh thawh hnihna inkara an zirchianna aṭanga virologist leh doctor-ten October-November thlaah a thawh thumna thleng thei tura an chhutlawkna chu, health expert-ten hri leng thar hriat tur a awm loh avangin hripui hian a chakna a hloh chho mek niin an ngai.

Health expert-te chuan October thla laihawl thlenga genomic sequencing leh zirchianna dang an neihah, hri inthlak danglam, variant thar a chhuak tawh lo niin an sawi. Hri kai thar leh, vaccine lak hnuah hri kai leh hi la awm chhunzawm reng mah se, heng hri kai thar hi an tlakhniam chhoh zel bakah a kai zinga a tam zawkin an la na tawh lo niin an sawi.

Hemi rual hian sorkar leh expert-te chuan ram mipuiten vaccine an lak kim theih hma, nakkum February thla thleng chu Covid kaihhruaina dante ṭha taka zawm chhunzawm zel turin an chah.

SARS-CoV-2 genomic sequenc-ing nodal officer Dr V Ravi chuan an zirchianna neihah chuan Delta variant kai leh he hri chakna pawh a tlakhniam mek thu a sawi. "Darhzau taka vaccine semchhuah a nih tawh avangin hri hian a chakna a hloh mek a, hri inthlak danglamin variant thar a siam chhuah theihna pawh a chhe hle a ni," a ti.

Variant thar, South America leh South Africa lama hmuhchhuah Mu leh C.1.2 chu India ram a rawn a thlen a rin loh thu a sawi. "Variant thar a awm a nih pawhin hri leng thawh hnihna chhunga vaccine-in min venhim theihna kan finfiah theih aṭangin Delta leh Delta Plus ai chuan a hlauhawmna a nep dawn a ni," tiin Dr Ravi chuan a sawi.

Randeep chuan "Kan inven ve reng erawh a la a ngai dawn a, covid vaccine dose hnihna 100%-a kan semchhuah theih hunah leh hripui lengin min kiansan a ni tih kan chian hma loh chuan Covid-appropriate behavior chu khauh takin kan zawm tlat tur a ni," a ti.