Uttarakhand-ah ruahsur nasa avangin mi 12 thi

Uttarakhand-a ni thum chhung ruah nasa taka a sur avangin chhiatna hrang hrang a thleng a, kawngpui leh chenna in tam tak tuilianin a chim a, lei dawhte tichhiain, khualzin eng emaw zat an tangkhang mek bawk. Ruahsur avanga chhiatna thlenga nimin tlai lam thleng khan mi 12 an thi tawh a ni.

Chief minister Pushkar Singh Dhami chuan an state-a chhiatna thleng chungchang chu prime minister Narendra Modi leh union home minister Amit Shah pawh a hrilh thusawiin, chenna in leh lei tam tak a chhia a ni, a ti. Chhiat tawkte chhanchhuah hna hi state leh national disaster response force-ten an thawk a, Army helicopter pathum hman a ni a, heng zinga pahnih chu Nainital regional-ah tirh niin, pakhat chu Garhwal-ah tirh a ni.

CM leh education minister Dhan Singh Rawat-te chuan nimin khan thlawhtheihna hmangin chhiatna thlenna hmunte an enkual nghal a ni.

Tourist destination lar tak, Nainital chu ruahsur vanga lei minin a pawhtu kawngpui pathuma hnawh avangin tlawh pawh theih loin a awm mek. Naini lui pawh a lian nasa hle a, a kama Naina Devi temple pawh tuiin a chim tawh a ni. Ramnagar-Ranikhet route-a Lemon Tree resort-ah khualzin 100 vel an tangkhang mek bawk.

Gujarat chief minister Bhupendra Patel chuan Uttarakhand sorkar chu puih a inhuam thu hrilhin, Thawhṭanni khan Gujarat aṭanga biakzina kal tangkhang mekte hruai hawna tur pawh a ruahman a ni. Uttarakhand CM Dhami pawh an dinhmun zawtin a bepawp reng tih a sawi.