Amit Shah hoin ram chhung security dinhmun sawiho

Union home minister Amit Shah-a kaihhruai national security strategies conference neihah ram chhung security dinhmun te, Jammu and Kashmir-a firfiakten civil mi an thah te, ramri kaltlanga drone hmanga ralthuam lakluh chungchangte an sawiho.

Thawhṭannia meeting neihah hian state leh Union Territory-a police hotute bakah central armed police forces (CAPF) hrang hrang hotute an tel bawk. Home Minister hian hetiang meeting hi police hotute nena ram chhung dinhmun dinhmun thlir leh sawiho a, hmalak dan turte ngaihtuah hoin kum khatah ṭum hnih a buatsaih ṭhin a ni.

Conference hi hybrid mode-a neih niin, a hmunah leh online hmangin an tel an ni. He conference hi Intelligence Bureau-in kumtina an neih ṭhin DGP/IGP conference hma hruaitu a ni a, DGP/IGP conference neih leh tura thurel tur ṭhenkhatte pawh enlawk a ni bawk.

Police hotu hrang hrangte hian venhimna kawnga an ngaihdan an thawh khawm a, J&K-a tualchhung mi ni lo te leh hnam bil tlem zawkten harsatna an tawhte sawi hoin, Afghanistan-a Taliban ten rorelna an chan dante leh India aṭanga IS-in India aṭanga member an lakluh dante pawh sawiho a ni bawk.

Amit Shah hian October 23-25 hian Jammu and Kashmir hi a tlawh dawn a, tualchhung dinhmun te pawh chipchiar zawkin thuneitute a sawipui dawn a ni. Hemi hunah hian police, army leh intelligence lam hotute nen pawh venhimna kawnga hma lak dan turte pawh an sawiho ang.

Thawhṭannia conference hi Intelligence Bureau chuan huaihawtin, junior home minister Nityanand Rai, NSA Ajit Doval, Home Secretary Ajay Bhalla leh Intelligence Bureau Director Arvind Kumar te'n an hmanpui. Shah hian IB headquarters-ah police martar-te zahna lantirna hun a hmang nghal a ni.