Sorkar fiah hmain Karnataka CM a bang ; Congress-JDS ṭangrual sorkar a ding dawn

Karnataka Chief Minister BS Yeddyurappa chu a kaihhruai BJP sorkarin thlawptu MLA a ngah tawk em tih fiah a nih hmain kar kalta Inrinni khan CM a nihna aṭangin a bang. Karnataka CM dinhmun hi ni hnih chiah a chelh hman a ni.

Karnataka Assembly inthlan neih zawh takah BJP hian party mala seat la hnem berin, MLA 104 anei a, mahse sorkarna siam tura MLA neih ngai zat 112 erawh a nei pha lo a ni. Congress leh Janata Dal Secular (JDS) ṭangdun chuan MLA 116 an nei thung. Mahse Karnataka Governor Vajubhai Vala chuan majority nei sa, Congress-JDS hi sorkar siam tura sawm loin, party mala seat la hnem ber BJP chu sorkar siam turin a sawm hmasa a, BJP hruaitu BS Yeddyarappa chu CM atan lakluh niin thlawptu a ngah tawk tih fiah turin ni 15 hun a pe zui bawk.

Karnataka Governor thiltih dan hian sawisel leh sawi zui a hlawh hle a, Congress-JDS chu Supreme Court-ah an zualko nghal bawk. Supreme Court chuan Governor-in BJP sorkar fiahna atana ni 15 hun a pek chu hnawlin,

Inrinni khan sorkar fiah tur hian a ti ta a ni. Hei bakah BJP-in sorkar fiahna turah secret ballot hman a dilna pawh court chuan a hnawlsak bawk.

Supreme Court thupek angin kar kalta Inrinni tlai dar 4 khan Karnataka Assembly-ah Chief Minister Yeddyurappa kaihhruai sorkar hi fiah tura tih a ni a, mahse CM hian hei hi kaltlangpui ngam loin sorkar fiah a nih hma lawkin banna a thehlut ta a ni. Yeddyurappa chuan sorkar siam tura MLA mamawh zat hi a nei pha lo tih sawiin, Governor hnenah CM a nihna aṭanga banna a thehlut a ni.

BJP sorkar a din theih tak loh vangin Congress-JDS thawkdun chuan Karnataka-ah hian ṭangrual sorkar an siam dawn ta a ni. Party pahnih thawkdunte hian Chief Minister atan JDS hruaitu HD Kumaraswamy dah an remti tawh a, Deputy CM atan Congress lamin G Parameshwara an dah ang. Governor Vala chuan Kumaraswamy hi sorkar siam turin a sawm tawh a ni.