May 23-ah ṭangrual sorkar lalut dawn:

Karnataka Chief Minister thar atan HD Kumaraswamy chu rinawmna thu tiamtirin vawiina lakluh tura tih an ni a, mahse vawiin hi prime minister hlui Rajiv Gandhi thih champha a nih vangin lakluh hun hi May 23-ah sawn a ni leh ta zawk a ni.

Kumaraswamy chuan May 21-ah Congress-JDS ṭangrual sorkar hi lakluh tura tih ni mah se, he ni hian Congress worker-te chuan ram pumah Rajiv Gandhi thih cham hriatrengna hun an hman dawn avangin a remchang lo niin a sawi.

Prime Minister hlui HD Deve Gowda fapa, kum 58 mi Kumaraswamy hian ṭangrual sorkar an din tur hi independent MLA pakhatin a thlawp dawn bawk tih sawiin, MLA 117 an nei dawn tih a sawi. Thlawptu an ngah tawk tih fiah turin Governor chuan ni 15 hun a pe a, mahse Kumaraswamy chuan ni 15 chhung nghah kher a ngai dawn lo niin a sawi a ni. Lakluh a nih aṭanga darkar 14 chhungin majority an nei tih a fiah nghal theih tur thu a sawi.

Karnataka CM thar tur, JDS hruaitu Kumaraswamy chuan vawiin hian Delhi-ah kalin Congress hruaitu Rahul Gandhi leh Sonia Gandhi te a hmu dawn. Congress-JDS hian ṭangrual sorkar an siam tura thuneihna insem dan tur pawh Inrinni zan khan an rel fel tawh a ni. MLA 78 nei Congress hian ministry pawh a chang tam zawk dawn nia sawi a ni. Party pahnihte hian coordination committee din an remti bawk.