CBI-in BJP MLA lakah thubuai ziak lut

Uttar Pradesh-a Unnoa hmeichhe pakhat kum tling lo pawngsuala puh, BJP MLA Kuldeep Sing Sengar-a lakah nimin khan Central Bureau of Investigation (CBI) chuan thubuai a ziak lut. MLA Sengar-a hi police kutah a awm mek a ni.

CBI hian pawngsual tawktu pa dik lo taka phiarruk chungchangah MLA lakah hian thubuai hi a ziaklut a ni. Hemi hma hian CBI chuan pawngsual tawktu pa thih dan kaihhnawihah Uttar Pradesh Police-a sub-inspector pahnih chu alo man tawh bawk.

Sub Inspector Ashok Singh Bhadauriya, Station Officer, leh Sub Inspector Kamta Prasad Singh te chu phiarruknaa inhnamhnawiha puh leh, finfiahna awmte tichhiaa puh an ni a, anni hi hren mek an ni.

BJP MLA hian kum 2017, June 4 khan Unnao-a a chenna inah hna thawh tur zawnga kal, hmeichhe pakhat chu a lo pawngsual nia sawi a ni. Pawngsual tawktu hian police-ah thubuai thehluh a tum chu police-te hian an lo dang niin a sawi a, thuneitu lamin an ngaihsak loh vangin intihlum a tum a, mahse an chhan hman a ni. Hemi hnu hian pawngsual tawktu pa hi police-te chuan Arms Act hnuaiah thubuai siamsakin April 5 khan jail-ah an dah a, a hnuah damdawi-inah enkawl niin a thi zui a ni. A ruang postmortem a nih hnuah a taksaah sawisakna hliam na tak a tuar tih hriatchhuah a ni a, hemi chungchang hi chhui zui a ni ta a ni.