Pakistan sipaiten J&K-ah border post kap leh

Pakistan sipaite chuan nimin zing khan Jammu and Kashmir-a Arnia sector-a international border-ah inkahhai thuthlung palzut lehin, border outpost an kap leh.

Pakistan sipaite hian zing dar 7 velah border outpost hi an kap a, Border Security Force (BSF) chuan an chhang let ve nghal a ni. BSF senior official chuan Pakistan sipaite hian border outpost pathum an bei niin a sawi. Pathianni zan khan Pakistan lam hian Samba district-a international border-ah India lam hawiin silai an lo hmetpuak tawh bawk a ni.

Kumin chhungin International Border (IB) leh Line of Control (LoC)-ah inkahhai thuthlung palzutin ṭum 700 chuang zet silai an hmetpuak tawh nia sawi a ni a, Pakistan sipaite nen inkahnaah hian mi 38 an thi tawh a, an zingah hian security mi leh sa 18 an tel.

Nimina Pakistan sipaiten ramri-a silai an hmehpuah leh vang hian ramri aṭanga km 5 bial chhunga school hrang hrangte chu venthawn thilah khar an ni. IB huam chhungah hian school 150 chuang a awm a ni.