Vawiinah Karnataka sorkar thar lalut dawn

Karnataka-a JDS-Congress ṭangrual sorkar thar chu vawiin hian lakuh a ni dawn a, Chief Minister atan JDS hruaitu HD Kumaraswamy lakluh a ni ang.

BJP hruaitu, BS Yeddyurappa chu ni hnih chhung chauh chief minister dinhmun a chelh hnuah, kar katla Inrinni khan Assembly-ah fiahna a paltlang ngam loh avangin a bang a ni. Hemi hnu hian Governor Vajubhai Vala chuan JDS-Congress thawkdun hi sorkar siam turin a sawm leh ta a ni. Party pahnih thawk dun hian sorkar siam tura MLA neih ngai zat 112 a nih laiin MLA 116 an nei pha a ni.

Vawiinah ṭangrual sorkar thar lakluh inkhawma telpui tur hian Kumaraswamy chuan chief minister pali leh eptu party hrang hrang hruaitute a sawm. Delhi Chief Minister Arvind Kejriwal, Andhra Pradesh CM N Chandrababu Naidu, Telangana CM K Chandrashekar Rao leh Bengal CM Mamata Banerjee-ten an telpui dawn nia sawi a ni a, Congress president Rahul Gandhi pawhin a telpui ang.

Kumaraswamy hi tlai dar 4.30-ah, Bengaluru-a state Secretariat (Vidhan Soudha) hmaah lakluh a ni ang a, political party hruaitute bakah lakluh inkhawmah hian mipui nuai khat vel an tel dawn nia sawi a ni. Kumaraswamy hi chief minister atana lakluh a nih ṭum hnihna a ni dawn a, kum 2006, February 4 khan BJP nena ṭangrual sorkar an siamah chief minister atan lakluh a lo ni tawh a ni. CM dinhmun hi kum 2007, October 9 thleng, thla 20 chhung a chelh a ni.

CM atanga bang ta, BJP hruaitu BS Yeddyurappa chuan Central Election Commission hnenah Karnataka assembly inthlan neih zawh takah thil fel lo tam tak a awm niin a sawi. Yeddyurappa chuan inthlan neih hma aṭang khan thil fel tawk lo a awm tih official-te pawh an hriattir a, mahse hmalakna engmah a awm lo a ni, a ti. Vijayapur district-a Managuli khuaah thlam pakhath VVPAT khawl hmuh a nih thute sawiin, hemi chungchang hi Election Commission chuan a ngaihtuah zui a beisei thu a sawi. He thil aṭang hian inthlanah hian thil felfai tawk lo a awm tih a langchiang hle niin a sawi.