Delhi Archbishop lehkhathawn ngaimawh

Delhi Archbishop Anil Couto chuan May 8 khan Delhi-a Archdioceses hrang hrang hnenah lehkha thawnin, nakkuma Lok Sabha inthlanpui neih hmain ramchhunga democracy leh sakhaw zalenna tiderthawng thilte a bo theih nana ṭawngṭai campaign nei turin a sawm a, hei hi BJP lam chuan Prime Minister Modi-a sorkar a beihna angah ngaiin an ngaimawh hle.

BJP thupuangtu Shaina NC chuan hetianga hnam leh sakhaw inkara boruak ṭhalo chawh chhuah tum chu thil ṭha lo tak niin a sawi a, Minority Affairs Minister Mukhtar Abbas Naqvi pawhin Prime Minister chuan sakhua leh hnam inthliarhranna awm loa hmasawnna thlen tir tumin theihtawp a chhuah a, hei vang hian midang pawh rilru zau tak pu tura a duh thu a sawi.

Reverend Couto chuan a lehkhathawn hi sawifiahin, politics lam engmah inrawlh a awm lo tih a sawi. Couto chua, “Ram tana ṭawngṭai chu englai pawhin a ṭul reng a, hei hi mimal thil a ni. Kan kohhrante chu kar khatah ni khat tal ram tana ṭawngṭai turin kan ngen a, hei hi midang inrawlhna chi a ni lo. Ramchhung thil thlengte kan ngaihven reng a ni. Hei hi ram tana ṭawngṭai tura mi ṭhenkhat ngenna mai a ni”, a ti. A lehkha thawn chu Modi-a sorkar a sawina a ni lo a, India khua leh tui a nih anga an vei zawng an sawilanna mai a nih thu a sawi bawk.

Tunhma lam pawhin inthlanpui neih hmain ram tana ṭawngṭaina hun neih a ni ṭhin tih sawiin, Archbishop chuan a lehkhathawn pawh chu Delhi-a Archdioceses hnenah chauh pek a ni a, hei hi mipuite leh Kristian sakhua hruaitute ngenna anga siam a nih thu a sawi bawk. Archbishop secretary Father Robinson pawhin lehkhathawn chu politics nena inkaihhnawihna nei lo a ni tih sawiin, BJP sorkar emaw Prime Minister emaw zah lohna leh beihna lam a ni lo a, thu dik tawk lo thehdarh chu thil ṭha lo tak a ni tih a sawi. He lehkha hi ram tana ṭawngṭai tura sawmna mai a nih thu sawiin, tunhma lam pawhin ngenna hi siam a lo ni fo tawh a ni, a ti.