Goa leh Mumbai-ah Nipah virus a darh hlauthawng

Kerala-a Nipah virus (NiV) leng mek chu Goa leh Mumbai lamah a darh a hlauhthawnawm niin official-ten an sawi a, hospital lam pawh fimkhur leh inralring tura hriattir an ni.

Goa Health Minister Vishwajit Rane chuan Kerala aṭanga kalte chu uluk taka endik an nih thu a sawi a, hei hi sorkar laipui lam aṭanga an thu dawn bawhzuia ti an nih thu a sawi bawk. Goa health department cuan Kerala sorkar chu NiV leng mek chungchangah nghawng a neih dante leh hri darh dan te a zawtfiah reng bawk a ni.

Kerala hmarlam, Kozhikode-ah chuan Nipah virus vanga thi nia hriat hi mi 12 an tling tawh a, hri hi a darh zel nia sawi a nih vangin mipui an chiai phah hle. NiV lanchhuah dan chi khat, khawsik sang neite chu inhlauthawngin hospital hrang hrangah pawh inentir an tam phah hle a ni. Sorlar laipui chuan hri leng mek leh a darh dante enfiah leh thunun theih dan ngaihtuah turin expert team a tir tawh bawk a ni.

Thawhṭanni khan Perambra-a EMS Cooperative Hospital-ah Nipah virus vanga thi nia hriat hi mi pali an awm a, an zingah hian NiV veite enkawltu nurse pawh a tel. Thi zingah nurse a tel avang hian hospital staff-te pawh an chiai phah hle. Kozhikode Medical College Hospital-a nurse pathum pawh khawsik sang leh lu na an neih avangn enfiah mek an ni a, Nipah an vei leh vei loh erawh finfiah ala ni lo. Heng nurse pathumte hian Nipah hrileng veitu chhungkaw pakhat ami an enkawl a, an damlo enkawl aṭang hian hri hi an kai leh kai loh finfiah a la ni lo.

Chief Minister Pinarayi Vijayan chuan mipuite chu chiai lo turin a ngen a, hri leng mek pawh khuahkhirh tuma theihtawp chhuah mek a ni, a ti. Private hospital ṭhenkhatin Nipah vei nia ngaihte an admit duh lo a, state sorkarin medical bill pek a remtih hnuah chauh an admit duh nia report awm pawh sawichhuakin, CM chuan private hospital-te chu theihtawp chhuahpui turin a ngen.