TN-a nawrh huaihawtnaah tharum thawhna thleng

Tamil Nadu-a Thoothukudi (Tuticorin)-a Vedanta Sterlite Copper unit khat phuta nawrh huaihatnaah nimin khan nawrh huaihawtte leh police-te an innawr buai a, police-te silai hmehpuahah mi pakhat thiin, mi dang parukin hliam an tuar.

Sterlite Copper unit khar phut hian hun rei tak nawrh huaihawt a ni tawh a ni. Thawhlehni khan nawrh huaihawtte chuan plant awmna lam pan hian kawng zawhin, anmahni lo dan tumtu police-te chu lungin an tawng zui a ni. Mipui pungkhawmte hi Collector office leh Sterlite plant-ah luh luih an tum a, police-te chuan lo dan tumin tiang an hman bakah tear gas-in an phuh bawk. Mipui thinrim hian Collector office-a motor dingte pawh an hal zui a ni.

Buaina a punlun zel avangin police hi koh luh belh an ni a, a bul hnai district aṭangin police 2,000 chuang chu dan leh thupek kengkawh tur hian Tuticorin-ah hian tirh luh belh an ni.

Eptu pawl DMK chuan Tuticorin-a buaina chhuah chhanah AIADMK sorkar chu a puh a, DMK president MK Stalin chuan AIADMK sorkar chuan Tuticorin bial mipuite harsatna chinfel tumin hma a la lo niin a sawi. An harsatna tawhte a ngaihthah sak a, nawrh huaihawt a ni dawn tih a hre chung pawhin venhim hna thawktu tur a dah ṭha tawk lo a ni, a ti. Tamil Nadu sorkar chu sterlite plant khar tura hma la nghal turin a phut tih a sawi.