Oct 11-17 chhungin Covid vanga thi 13% in tlahniam

World Health Organisation (WHO) in a tarlan danin, kar liam ta October 11-17 chhung khan India ramah Covid-19 hri kai thar a kar hmasa aiin 18% in a tlahniam a, hemi chhung vek hian hri vanga thi pawh 13% in a tlahniam bawk.

WHO-in Covid-19 Weekly Epidemiological Update a tihchhuah tharah, kar liam ta chhung khan khawvel pumah hri kai thar maktaduai 1.7 chuang leh thihpui 46,000 chuang an awm a ni. Khawvel pum huap chuan a kar hmasa nen hri kai thar leh thihpui zat hi a danglam vak lo thung.

European Region tih loh hmun dangah chuan kar liamtaa hri kai thar hi a kar hmasa aiin a tlahniam vek a, European Region-ah erawh chuan 7% in an pung thung a ni.

Kar khat chhunga hri kai tlakhniam nasatna ber chu African Region niin 18% in a tlahniam a, Western Pacific Region-ah 16% in a tlahniam bawk. African Region hi kar khat chhunga hri vanga thi an tlakhniam tamna ber a ni bawk a, thi zat hi 25% in an tlahniam a ni.

Kar liam ta chhunga hri kai hmuh chhuah thar tamna ber chu US niin mi 8,52,707 hmuh chhuah a ni a, mahse a kar hmasa aiin 11% in an tlem tawh zawk thung. UK-ah 2,83,756, Russia-ah 2,17,322, Turkey-ah 2,13,981 leh India-ah 1,14,244 te kar liam ta chhung khan hri kai thar an awm.

India ramah kar liam ta chhung khan hri kai thar 1,14,244 awm mah se a kar hmasa aiin 18% in an tlem tawh zawk thung. South-East Asia Region-a hri kai thar tamna dangte chu Thailand (72,817) leh Myanmar (9,202) te an ni.

October 19 thleng khan Covid-19 hri zinga Alpha variant chu ram 196-ah hmuh chhuah a ni tawh a, Beta variant chu ram 145-ah, Gamma variant ram 99 leh Delta variant chu ram 193-ah hmuh an ni tawh bawk.