Vanglaini logo

Bangladesh-a Hindu beihna duh loin Vishva Hindu Parishad(VHP) ten lungawi lohna lantir

Vishva Hindu Parishad (VHP) chuan Bangladesh-a Hindu te beihna leh temple leh Durga puja neihna hmunte suasam a ni chu duh loin, nimin khan ram pum huapin lungawi lohna an lantir.

Delhi-a Bangladesh High Commission kawt­ah VHP member-te chu pungkhawmin lung­awilohna an lantir a, ramchhung hmun hrang hrangah pawh nawrh hi huaihawt a ni bawk.

VHP joint general secretary Surendra Jain chuan, "Bangladesh-a Hindu te chunga kut­thlakna thleng zozai hian record zawng zawng a khum vek tawh a ni. Hindu mi sang chuang ten hliam an tuar a, an zinga mi 10 te chu an thi tawh a ni. Hindu society chuan nunrawng taka chetna hi kan palzam thei lo a ni," a ti.

Durga puja lawmna neih laia sakhaw sawi­chhiatna lam hawi social media lama post a nih hnuah, kar liam ta Nilaini aṭang khan Hindu sakhaw zuitute leh an temple-te chu nasa taka beih an ni. Pathianni zang khan mipui pungkhawmte chuan Hindu-te chenna in 66 an tichhiat bakah, in 20 vel an halsak bawk. Hetianga pawikhawihna thleng hi an dem thu sawiin, VHP chuan Bangladesh sorkar chu Hindu te chunga tharum thawhna thleng chu titawp a, an himna tur ngaihtuah sak turin an phut tih an sawi.

VHP hi United Nations hnenah pawh zualkoin, pawikhawihna a thlen hnua demna thu sawi mai loin chak zawka hma la turin a ngen a, Bangladesh-a Hindu-te chunga tihduhdahna thleng fo veng turin UN sipai, peacekeeping force dah turin a ngen a ni.

"Kum 1971-a kan tih ang bawkin firfiak taka chete chu kan thunun leh an ngai dawn a ni. A ṭul a nih chuan Bangladesh sorkar hian India sorkar ṭanpuina pawh a dil mai tur a ni," tiin Jain chuan a sawi.

"India sorkar pawh Hindu sakhaw zuitute himna leh ralmuang taka a awm theihna turin Bangladesh sorkar chu na taka nawr turin kan ngen bawk a ni," a ti.

Bangladesh prime minister Sheikh Hasina chuan Thawhlehni khan home minister chu sakhuana hmanga pawi­khawih­na thleng ṭhin te chu rang taka chingfel tura chahin, mipuite chu social media-a post-te chu a tak a ni em tih ennawn hmasa ṭhin turin a chah.