Karnataka-ah JDS-Congress sorkar lalut ; CM atan Kumaraswamy lalut

Karnatak-a JDS-Congress ṭangrual sorkar chu nimin tlai 4:30 khan lakluh a ni.

Governor Vajubhai Vala chuan Vidhana Soudha-ah Chief Minister atan JDS hruaitu HD Kumaraswamy chu rinawmna thu tiamtirin a lalut a, Deputy CM atan Congress hruaitu G Pawrameshwara lakluh a ni bawk.

Karnataka Assembly in­thlana party mala seat la hnem ber, BJP chu sorkar siam tura sawm hmasak ni mah se, sorkar siam thei tur MLA a ngah tawk loh avangin kar kalta Inrinni khan fiah a nih hmain BS Yeddyurappa chu chief minister a nihna aṭangin a bang a ni. Hemi hnu hian Governor Vajubhai Vala chuan JDS-Congress thawkdun chu sorkar siam tur hian a sawm leh ta a ni.

JDS-Congress thawkdun hian sorkar siam tura MLA mamawh zat 112 a nih laiin MLA 116 an nei pha a ni. ṭangrual sorkar hi Thawhṭanni khan lakluh tura tih a ni a, mahse hemi ni hi Congress hruaitu leh prime minister hlui Rajiv Gandhi thih champha a nih avangin nimin atan sawn a ni leh ta zawk a ni.

Party pahnihte hian chanvo insem dan tur pawh an tifel nghal a, Congress hian MLA ngah zawkin 78 nei mah se chief minister dinhmun hi MLA 38 neitu JDS lamin an chang zawk a, Congress hian deputy CM an chang thung. Ministry 34 awm turah Congress chuan 22 changin, JDS hian 12 a chang dawn a ni. Speaker hi Congress lamin changin, JDS hian Deputy Speaker a chang thung ang.

Karnataka sorkar thar lak­luh inkhawm hi Congress president Rahul Gandhi, UPA chairperson Sonia Gandhi, West Bengal Chief Minister Mamata Banerjee, Andhra Pradesh CM N Chandrababu Naidu, Delhi CM Arvind Kejriwal leh Kerala CM Pinarayi Vijayan-te bakah central-a eptu party hruaitu eng emaw zatin an hmanpui a ni.