Sterlite Copper plant-a power supply titawp turin hriattir ; CM-in police-te thlavang a hauh

Tamil Nadu chhim lam, Thoothukudi (Tuticorin)-a Sterlite Industries-in copper smelting plant a siam duh lohna lantira nawrh huaihawtnaah buaina nasa tak chhuakin, police-te silai hmehpuahah mi 12 in nunna an chan tawh. He thil thleng vang Tamil Nadu Pollution Control Board chuan Thoothukudi District Collector hnenah plant-a power supply pek chu titawp turin a hriattir.

Hetih lai hian Chief Minsiter EK Palaniswami chuan nawrh huaihawtte lam hawia police-ten silai an hmehpuah chungchangah police-te thlavang hauhin, mahni invenna atana ti an nih thu leh, silai hmehpuah chu a hmaa an tum lawk a nih loh thu a sawi. Police-te chu mahni inveng tura an chet a thiang a ni, a ti. Buaina punlunna chhan chu political party leh NGO ṭhenkhat ten mipui an fuihpawrh vang niin a puh. Tualchhung mite chuan copper plant siam tur hian an bialah boruak bawhhlawh a siam nasa nia sawiin thla thum zet chu duh lohna an lo lantir tawh a ni. Thawhlehnia nawrh an huaihawtnaah police-te nen innawr buaiin, police-ten tear gas an hman bakah pungkhawm lam hawiin silai an hmetpuak bawk. Tharum thawhna thlenga mawhphurtua puh mi 67-te man an ni bawk. Police-te chetdan hian sawisel a hlawh nasa hle a, Union home ministry pawhin thil awmdan kimchang report turin Tamil Nadu sorkar a hriattir a ni.

Thoothukudi biala thil thleng duh lohna lantirin nimin khan eptu pawl, DMK working president MK Stalin chuan Tamil Nadu Chief Minister EK Palaniswami-a office kawtah nawrh a huaihawt a, party member ṭhenkhatin an ṭawiawm. DMK hian vawiinah bandh huaihawt an tum bawk.

Tamil Nadu-a eptu party-te chuan Thoothukudi biala buaina chhuakah sorkar hmalakna chu a ṭha tawk lo tih sawiin CM hi bang turin an phut a ni. Stalin chuan mi 12 in nunna an chan hnuah pawh pawikhawihtu police-te chungah action lak a la ni lo tih sawiin, CM bakah DGP Rajendran te chu bang tura an phut thu a sawi. Hei bakah hian buaina chhuaka hliam tuar, damdawi-ina awmte chu CM hian a la tlawh lo tih sawiin, Thoothukudi district-a kala thil awmdan thlithlai leh mipuite hmuh pawh a tum lo a ni, a ti.

Madras High Court-a Madurai bench chuan plant siam hna thawk mek chu chawlhsan rih turin a lo hriattir tawh bawk a, Tamil Nadu sorkar chuan buaina punlun zel tur venna kawng khat atan chhim lam district-ah hian ni nga chhung atan internet service a titawp bawk a ni.