J&K-a ramri khua aṭangin mi nuai khat chuang tlanchhia

Pakistan sipaiten Jammu and Kashmir-a international border-ah inkahhai thuthlung palzuta India lam hawia silai an hmehpuah fo avangin ramri bul khuaa cheng mi nuai khat zet chu an tlanchhe tawh.

Jammu, Kathua leh Samba district-a ramri bula thingtlang khaw hrang hranga chengte chuan an khua chhuahsanin, hmun danga an chhungte an bel a, mi ṭhenkhat relief camp-ah an awm bawk. Tlanchhiate hian hmun him zawka awmna tur ram pe turin politician-te an ngen thu an sawi.

Pakistan sipaite hian ramri hrulah khuate leh BSF post-te an bei fo a, kar hmasa khan Pakistan sipaite silai hmehpuahah hian mi pali an thi a, midang 25 in hliam an tuar a ni. Ramri bula chengte chuan ramri-a inkahna thleng hi a hma pawhin an lo hre fo tih an sawi a, mahse central-a BJP a sorkar hnuah a thleng nasa zual niin an sawi.

Sorkar laipui chuan Pakistan sipaiten inremna palzuta a, Jammu and Kashmir-a civil mite chenna lam hawia silai an hmehpuah chungchangah Nilaini khan Pakistan deputy high commissioner Syed Haider Shah chu koin, a lungawi loh thu a thlen tawh bawk.